Aizawl; Tun hnai deuh atang khan two wheeler taxi bo a awm nual a, taxi bo te hi a neituin a driver an hriatchian loh te an ni tlangpui nia thudawn a ni.

ZALEN-in Aizawl Two wheeler Taxi Association (ATTA) hruaitute hnen atanga thu a dawn danin mi tam tak chuan an driver-te hrechiang lo leh zirchiang hmasa lovin an lirthei an khalhtir a, heng mite hian an tlan bopui duh bik niin an sawi.

ATTA hruaitute chuan tun hnaiah pawh taxi tlan bopui hi an awm nual nia sawiin police lama report bakah association hnenah tanpui tura ngenna pawh an dawng nual niin an sawi a. “Mi tam tak chuan an driver-te chu tute nge an ni tih leh an address-te chhuichiang hmasa lovin an khalhtir mai thin a. Mi sual thenkhat chuan remchangah hmangin lo hralhsakte pawh an awm thin a, mi tinte fimkhur se kan duh hle a ni,” a ti.

ATTA member tur chuan driving license neih ngei a ngai tih sawi bawkin tun hnaia lirthei tlan bopuitute chu an member-a inziak lut lote niin an sawi.

ATTA hruaitute chuan an member-te chu fihlim vek lo mah se taxi neituten ATTA member-te ngei driver atan hmang thei se an duh tih sawiin, “Kan member-te hi chu an chanchin kan chhinchhiah vek bakah ID kan siamsak avangin eng emaw harsatna thleng thei lakah pawh a himin chhuichhuah zung zung a awlsam bik a. Chu mai bakah thil dik lo ti an awm a nih chuan an chungah hremna kan lekkawh avangin lirthei neitute pawhin kan member-te hi hmang hram se kan duh a ni,” an ti bawk.