Aizawl January 30, 2023: MNF Legislature Party (MLP) chu Chief Minister Zoramthanga hovin vawiin khan Assembly House Recess Room A-ah an thukhawm a. MNF sawrkar kal meka hmalakna te thlir hovin February 7-a tan tur Mizoram Assembly Budget Session an thlir lawk. SEDP leh Uniform Civil Code (UCC) chungchang te an sawiho a, UCC duhlohna pass dan kawng dap ni se an ti.

Uniform Civil Code hmang tura hmalakna awm mek chu MLP chuan tha an tih lo thu thutkhawmnaah hian sawi a ni a, Assembly budget session lo awm turah hian lungrual taka UCC duhlohna pass dan kawng dap ni se tih chu sawihona atanga an thutlukna a ni. 

MLP thukhawm chuan SEDP First phase-ah chhungkaw sing ruk hnenah first instalment chu a dawng tur chhungtin hnenah Rs 25000 zela pekchhuah a nih tawh thu leh second instalment pek leh tur pawh sanction a nih tawh thu leh a tahtawla semchhuah thuai anih tur thu report pek a ni. Chhungkaw sing ruk pek mek bakah sawrkar kumthar, 2023-24 ah chhungkaw dang, Second Phase leh Third Phase thlenga thlan belh leh turah hmalak ni se tiin an rel bawk a ni..

Inkalpawhna kawngpui tha zawk Mizoram mipuiten an neih theih nan MNF sawrkar tirh atanga theihtawp chhuah anih thu sawi a ni a, tan lak chhunzawm zel turin an rel bawk a ni.