Aizawl August 13, 2023: BJP Mizoram Pradesh President Vanlalhmuaka chuan Uniform Civil Gode leh Forest Conservation (Amendment) Bill, 2023 te chu Mizoram tan a hlauhawm loh niin a sawi.

ZALEN-in a kawmnaah BJP President chuan UCC chu British-in India an awp lai atanga hman an tum tawh, prime minister hmasa ber Nehru pawhin hman a lo tum tawh niin a sawi a. “Hindu sakhuaa hnam tha leh hnam chhia inthliarna awm tihbo nan te, Muslim mipaten nupui duh zat zat an neih tihbona tur te, Mosolman hmeichhe dinhmun chawisan nan leh roluahtu tur siamremna atan te a nih avangin sawrkar laipui chuan hman ngei a duh a ni,” a ti a. 

UCC chu Mizoram tan a hlauhawm lo nia sawiin, “UCC hi parliament-ah pass pawh nise a hmangtu tur state-te remtihna tel lo chuan an state-ah hman theih a ni lo a. Chubakah home minister-in UCC hi 6th Scheduled huam chinah te, Kristian awmna leh chi inthliarna awm lohna hmunahte hman a ni dawn lo tih a sawi bawk a. Chuvangin, keini state chu min huam ve dawn loh avangin lo hlauh tur a awm lo a ni,” a ti.

Forest Conservation (Amendment) Bill, 2023, a hnua act ni ta pawh state assembly-in a pawm phawt loh chuan hman a ni dawn lo niin Vanlalhmuaka chuan a sawi bawk a. “Mizoram chu Article 371 (G) neitu kan nih avang leh 6th scheduled hnuaia awm kan nih avangin state assembly-in a remtih phawt loh chuan he dan hi hman a ni dawn lo a. Chuvangin, lo buai phili leh lo hlauh hi a sawt lo a ni,” a ti bawk.

Kumin kumtawp MLA inthlan lo awm turah BJP chu seat 40 chuh turin an inbuatsaih mek niin a sawi bawk a. “Bial 40 zingah hian that bikna, that vak lohna leh that lohna bial te kan nei a. Bial 14 velah hian tha hlein kan inhria a, a hmaa bial 18 vela tha thina kan inhriat kha Manipur buaina vangin kan hniam leh deuh a. Heng kan thatna bialah hi chuan tling ngei turin theihtawp chhuah kan tum a ni,” a ti a. An party candidate tur chu inthlan puan hunah puan an tum nia sawiin Hmuaka chuan, “Election neih hun tur an puan hunah chauh candidate hi puan kan tum a, hmeichhe candidate tel lo chuan inthlan hi chuh kan tum lo a ni,” a ti.

Tun hnaia Congress president-in hun thim hmachhawn nia a sawi chungchang chhangin Hmuaka chuan, “Congress party hi kum 20 chhung min nghaisatu leh hun thima min dahtu, mahni khua leh tuite pawh bomb-tu an ni a. Hei mai bakah India ram state 22-a bawng talh khapna dan siamtu an nih bawk avangin an party hi an la ral dawn a ni,” a ti bawk.