September 12l 2023; Mizoram State Animal Welfare Board (MASWB) in sawrkar department hotute hnen a an department chaw eikhawmnaah uisa telh lo tura an ngen hnu-ah, Kolasib district chhung a chaw eikhawmna leh thil tih khawmna reng rengah uisa telh khap a ni.

Vawiin khan Kolasib DC in public notice ti chhuakin, Director, AH&Vety atanga lehkha a dawn angin, The Mizoram Slaughter (Amendment) Act 2020 Section 2 (a) chuan mihring ei atana ran talh a phal zingah ui a chhiar tel loh avangin ui talh chu dan lo a ngaih a lo ni ta tih a tarlang a, Food Safety and Standards (Food Products Standards and Food Additives) Regulation 2011 (2.5.1) chuan mihring ei atana ran talh theihte zingah ui a telh lo bawk, tiin a tarlang. 

He sawrkar hriattirna hi Kolasib district huam chhungah zawm theuh tur a nih thu a tarlang tel bawk.

Hemi hma August thla bul lam khan MASWB chuan sawrkar department hotute hnenah lehkhathawnin, an department chaw ei khawmnaah uisa telh lo turin ngenna an lo thlen tawh bawk.