Aberdeen-a pitar kum 81 mi chuan kum 30 zet a liam hnuah a ipkhai (handbag) an ruksak chu a hmu let leh ta!

Audrey Hay-i hian a bag hi a hnathawhna thin hmunah a keng a. A rutu hian a chhunga a pawisa dah, pound 200 a laksak hnuah River Don-ah a paih zui ta nia ngaih a ni.

Thawhlehni khan River Don hnara a nu leh pate nena leng khawthawng, naupang kum 11 mi, Maisie Coutts-i’n a hmu a, a chhungah eng eng emaw a lo la awm nual bawk.

Social media hmanga a neitu zawngin a neitu, Hay-i hi an zawng chhuak ta a. Bag an chhar lai hian pen, pawisa thir, hmui hnawih, bengbeh, chabi leh damdawi mum a lo la awm a ni. 

Maisie-i chuan, “Ka ui leh ka nu leh pa nen kan tei chhuak a, ‘Saw, handbag a nih saw!’ ka ti a. ‘Nu, handbag thar i duh em?’ ka ti zui a. A chhungah thil pawh a la awm mai thei tih ka sawi bawk.

“Kan han hawn chuan credit card ni awm tak a lo awm a, a hming chu chhiar fuh a har deuh tawh a, tunge ni ang, a thi tawh ang em, a tak a ni em tih pawh kan hre lo. Inah kan haw a, a hming chu uluk zawka kan en hnuah Audrey a ni tih kan hre ta a, kan en kual leh hnuah a chungchang pawh kan hre thui thei ta deuh a ni,” tiin BBC Scotland News hnenah a sawi.

A nu, Kim-i pawhin, “Card-a ni kan en chuan kum 1993 vek a lo ni a, tuiah rei tak a lo awm tawh ni ngeiin ka ngai nghal a. Social media-ah kan dah chhuak a, Audrey-i chu kan hai chhuak ta a. Audrey-i pawhin a ta ngei a nih thu leh kum 30 liam taa an ruksak a lo ni a ni,” a ti.

Coutts-i hian, “Social media thiltihtheihna hi a lo chak hle a ni,” a ti.

“Ruk a ni a, pisaa ka awm loh lai a ni a, ka let leh chuan ka dawhkan hnuaia ka dah chu a lo bo daih a. Police ka bia a, ka hriat chin pawh ka hrilh vek a ni,” tiin bag neitu, Hay-i chuan a sawi.

Hay-i hian a bag bo, a hmuh leh tak chu pound 240 man a nih thu a sawi bawk.