United Kingdom (UK) prime Minister thar atan Rishi Sunak chu rinawmna thu tiam tira lakluh a ni ta. UK politics hi a chiri hle a, kuminah ringawt pawh prime minister pathum an neihna a ni tawh!

UK prime minister zingah kum 58 mi Boris Johnson-a'n a term hmang zo loin lal thuthleng a kal san a, amah thluktu atan Liz Truss a rawn pen chhuak. Hmeichhe prime minister hi a lakah beiseina sang hle mah se an ram economy a that loh em avangin loh theih lohin a bang ve leh a, thla tam pawh hna a thawk hman lo. Liz Truss hian banna a thehluh avangin amah thlaktu tur thlan leh nghal a ni a, Conservative Party chuan kum 42 mi Rishi Sunak hi an rawn vawrh chhuak leh ta a ni. 

Rishi Sunak hi a nu leh pate chu Indian an ni a, kum 1960 khan East Africa atangin British-ah an pem lut. Rishi Sunak hi  Southampton, England-ah a piang a, kum naupangte ni mah se politics-ah sulhnu a nei tha hle. UK prime minister naupang ber zinga mi niin, a hausa hle bawk. 

Khawvel ram hrang hrang hruaitu lawkten duhsakna an hlan a, India Prime Minister Narendra Modi leh midang eng emaw zatin lawmpuina thu an thawn. Amah hi Kristian a ni lo a, Buddhish sakhaw puithiam Dalai Lama pawhin duhsakna a hlan nghe nghe.