Aizawl: AH & Vety Department in United Kingdom atanga vawk tha chi 45 an chah chu nizan khan New Delhi atang rawn phurh tum a ni a, mahse Covid vangin thulh a ni.

AH&Vety department thawktute hnen atanga Zalen in thu a dawn danin UK atang hian vawk tha chi 45 lei a niin heng vawk te hi February thla khan New Delhi rawn thlenpui a ni tawh a. New Delhi ah hian ni 30 chhung dah hran tur anih angin quarantine centre-ah dah an ni a, dah hran hun chhung hi zo tawh mahse India ram pumah inkharkhip puan anih avangin Mizoram pan pui mai theih a ni ta lo a ni.

AH&Vety dept. in ruahmanna an siam dan chuan heng vawk leh anmahni buaipuitu Vety department thawktu mi 3 te chu a bika siam lirthei, motor lian 3 leh motor te 2 hmangin Delhi atangin Mizoram rawn panpui tum a ni a. An rawn paltlang tur state ah te harsatna a awm loh nan Mizoram DGP chuan state dang DGP te hnenah lo ngaihhnathiam tura ngenna a thlen tawh a ni.

Heng vawk te hi Thingsulthliah a Vety hmunah dah tum an ni a, hetah hian inthlahpun tirin mipui lei theih tura no neih tir tum a ni.