Crimean peninsula leh Russia inkalpawhna kawng awm chhun, lei sei takah lorry a puak tih Russian thuneituten an sawi.

Lirthei kalna bika thil puak hian a bula rel kawnga tuialhthei phur chu a kang kai a, lirthei kalna kawng hi a chim.

Crimea hi kum 2014 atanga Russia-in an awp niin tuna lei chhe ta hi Ukraine-a indona awm meka an châk lakna kawngpui ber pakhat a ni.

Lei pawimawhna hi a tam em em bakah Russia tan chuan an ropuina tihlanna pakhat a ni a. Kum 2018 khan President Vladimir Putin-a’n a hawng a, Crimea chu Russian ta a nihzia lantirnaa ngaih a ni.

Russia hian tuna indona kal mekah hian  Ukraine chhim lam indona hmuna sipai hmanrua, ralthuam leh sipai a thawn luhna kawngpui ber a ni.

Ukrainian thuneitute chuan peninsula lak let an tumna kawngah lei hi an bitum ber a nih ve thung thu an sawi ve bawk.

Russian sipai tam takin an awmchilh mek, Crimea-a hetiang thil thleng liantham a awm hi Kremlin tan chuan mualphona lian tak dang a tling.

Ukrainian-te hian lei hi an duh lo hle a. Social media-ah pawh lei a kang chhia tih an hriat chuan lawmawm an tih thu an tar lang nasa hle.

Leiah hian lirthei leh rel tlan tihtawp rih a ni a. Crimea-a tual chhung thuneitute chuan Russia leh peninsula inkarah hian lawng service-tir thuai a ni dawn tih a puang nghal.

Russia-a National Anti-Terrorism Committee (NAC) chuan, “Moscow huna tukin zing dar 6:07 (India-a Inrinni zing dar 8:37)-ah Taman peninsula lampang Crimean bridge-ah bungraw phur a puak a, Crimean peninsula pan fuel tank pasarih a kang zui a. Lirthei kalna bik hi thenkhat a chhia a ni,” a ti.

Crimean parliamentary speaker Vladimir Konstantinov chuan Ukrainian-te tihah a chhal a. President Putin-a pawhin chhuina tur thu a pe nghal.

Ukraine lam chuan Crimea leh Russia inkalpawhna lei kang chhia hi an lawm hle a, social media-ah pawh lawmawm an tih thu an tar lang nasa hle.

Ukrainian sorkar Twitter-ah pawh, “Sick burn,” tiin an tar lang.

President Zelensky-a adviser, Mykhailo Podolyak chuan he lei chhia hi ‘bul tanna’ tiin a sawi a, Ukrainian-te tih a nih erawh a sawi dawt lo thung.

“Dan lova thiltih reng reng tihchhiat vek a ni dawn a, thil rukte pawh Ukraine-ah lak kir vek a ni ang a, Russia-in a luahte chu hnawh chhuah vek an ni ang,” tiin Twitter-ah a tar lang.

Ukraine defence ministry chuan leia thil puak chu April thlaa Russia ta, Moskva missile cruiser pil ta nen a tehkhin.

“Ukrainian Crimea-a Russia thuneihna lantirna lian pahnih chu a boral ta,” tiin a tar lang a. “Engnge a dawtah ni leh dawn?” a ti.