Russian tennis icon Maria Sharapova chu an ramin a run avanga harsatna tawk mek, Ukraine naupangte tanpui turin a che chhuak. 
Sharapova hian Ukraine naupang harsatna tawk mekte tanpuina turin donation a hlan dawn tih a sawi a, an ram president Vladimir Putin chet dan a dem thu huaisen takin a au chhuahpui bawk. 

Grand slam vawi nga chawi tawh Sharapova chuan indona avanga harsatna tawk mekte tanpui hna rim taka thawktute hnenah tanpuina hi a hlan dawn tih a sawi a, ei leh in tur bakah an mahmawh phuhrukna turin tanpuina eng emaw zat a pek tur thu a tarlang.

Donation hlan tur hian midang pawh sawmiin, remna leh muanna a awm leh thuai theih nana tawngtaipui an ngaih thu a tarlang bawk. Russian tennis star dang Daniil Medvedev leh Andrey Rublev te pawhin indona thleng chu pawi an tih thu leh, tihtawp an duh thu an lo au chhuah pui tawh a ni. 

Russia-in Ukraine a run chhan hi politics thil ni mahse infimna pawhin nasa takin a tuar a, International Tennis Federation (ITF) pawhin Russia leh Belarus tennis player te chu inkhel thei lo turin a hrem a ni.