October atang hian India ram pum huapin polythene bag, micron 50 aia hniam te chu khap a ni dawn a, Aizawl Municipal Corporation (AMC) chuan April 1, 2019 atang khan polythene kaihhnawiha eizawng leh sorkar chu a lo hriattir tawh. Anni hian polythene la awm te hi an vai chho reng a, mahse, dawr tin maiin an la hmang a tih theih a, awmzia a la awm vak lo niin a lang. Awlsam taka hman theih polythene bag hi Aizawlah thla hnih zet umbo tumin hmalak ni mah se, a dinhmun a la sawhsawn thui lo hle!

AMC lam hian na takin polythene bag hi man khawm tumin hma an la chho reng a, a bik takin Aizawl Bazarpui, Dawrpui-ah phei chuan a khat tawkin an vai reng. Mahse, bazar-puia bazar polythene pakhat tal khai hawng lo an awm an rin loh thu bazar nu thenkhat chuan Zalen an hrilh. AMC lam chuan bazar lam hi an dap ngun hle tih an sawi a, mahse, anni lam hian rang takin an inhrilh hre chhawng ve nghal thuai a, an polythene kawl te chu a rang lamin an thukru mai thin.

August 1, 2019 atang khan AMC hian khapna hi a kalpui tan a, chanchinbu leh local TV cable kaltlangin mipui te hnenah ngenna pawh vawi tam tak an chhuah tawh. Mipui lam pawhin he thil hi kan ngeihven viau niin a lang a, mahse, hman loh lamah hi chuan tan kan la vak lo tih a hriat. AMC chuan October 2 hi chuan Aizawl hi plastic-free khawpui ni hman turin theihtawp a chhuah a, mahse, tuna a lan danah hi chuan awmzia a nei rih vak lo niin a lang.

AMC-in polythene an khap chungchangah hian Local Council lam nen hian an thawhhona hi a fuh vak lo ni te hian a lang bawk a, tunah hian Local Council lam hian bawlhhlawh - tawih thei leh thei lo, paih dan chungchangah hian hma chu nasa takin lak pui mah se, polythene hman hrim hrimah hi chuan hmalakna an neih pui meuh lo niin a lang. Veng tina dawr tinah polythene bag hi an thil zawrh lei te pechhuak nan an la hmang deuh vek a tih theih.

Aizawl hi India rama smart city thlan chhuah 100 zinga pakhat a ni a, AMRUT scheme hnuai ah smart city a puan khawpui te hi chuan National Tribunal thu angin October 2 hma ngei hian plastic-free city an nih a ngai a ni.

Plastic atanga siam thenkhat khap hi India ram state 21 te chuan an kalpui tawh a, state 5 phei chuan leilung chhiatna thlen thei plastic chi reng reng hi khap vek an tum a, state 10 te erawhin hmalakna an la kalpui lo thung.