Aizawl: Mizoram Health Department te thawhpui UNICEF leh USAID chuan hriselna kawnga thawktu leh mipuite zirtirna atana tangkai tak tur bungrua engemawzat Dr Eric Zomawia, Mission Director, National Health Mission hnenah an hlan. Heng an thil hlan te hi Pico Projectors- 6, megaphones-60, juke boxes - 25 leh UNICEF India atangin mannequins -54 lai an ni.

Mipui vantlang inzirtirna atana hman chi pawimawh tak tak – Pico Projectors, megaphones, juke boxes te hi UNICEF & USAID tangkawpin an pek niin, Dr Aribam Rebecca Sharma, State SBC Consultant UNICEF Mizoram, UNICEF & USAID aiawh chuan Covid leh Covid Vaccination chungchangah te, Nu leh Nau (Reproductive & Child Health) leh Routine Immunization te enkawlna kawngahte an tangkai beisei avanga pe an ni tih a sawi. Heng ang khawl an pek hi Civil Hospital Aizawl, District Hospital, Sub- District Hospital leh PHC/ HWC/SC thlan then khatah pek a ni ang.

Mannequin chi hrang hrang 54 (18-Mamantalie, 18-Neonatilie, 18-Premienatalua) te hi damdawi lama thawktu ten nu naupai leh nausen enkawl dan tur inzirtirna atana an hman tangkai thin em em a ni a, hei hi UNICEF India in an pek a nih thu Janmejaya Meher State RMNCH+ A & RI Consultant UNICEF Mizoram chuan a sawi.

Dr Lily Chhakchhuak, State Programme Officer, RCH chuan an mamawh tak mai pek an ni hi Nu leh nau thihna titlemtu pawimawh tak a nih bakah thawktute tan an thiamna kawnga hmasawnna (quality of care) hmanraw pawimawh tak a nih tur leh mipui vantlang hriselna kawng zirtirna hmanrua pawimawh tak an ni dawn a ni a ti.

Dr Eric Zomawia chuan UNICEF leh USAID te chungah lawmthu sawiin tunhma pawhin an thil mamawhte an lo pe fo tawh thin a, chumai bakah thawktu mi engemawzat NHM hnuaiah an rawn dah bawk a, thilpek man tam tham tur tak an pe leh hi a ropui a, tangkai takin a mamawhturte a bik takin hmun harsa leh kilkhawra awm te tan a tangkai hle dawn a ni a ti.