ZALEN, Mar. 14, 2025: Vawiin chawhnu dar 3 khan Union Home Minister Amit Shah chuan Mizoram sawrkar leh Assam Rifles ten ram an inhlantawnna hun a hmanpui a. Shah chuan, "Assam Rifles-te Zokhawsanga sawn chu Mizoram tan bung thar kaina a ni," a ti.

Ram inhlan tawnna hun hi 23rd Sector AR, Khatla-ah neih a niin Mizoram sawrkar aiawhin Zokhawsang-a Assam Rifles ram tur hi Mizoram sawrkara Commissioner Vanlaldina Fanai chuan AR hnenah a hlan a, Aizawl khawpui chhung hmun hrang hranga AR-te luah ram eng emaw zat chu Assam Rifles DIG Brig. Girish Upadhaya chuan Mizoram sawrkar kutah a hlan thung.

Ram inhlan tawnna hunah hian thu sawiin Union Home Minister Shah chuan, "Aizawl khawpui hi a chep tawh hle a, hmasawnna hna thar thawk tur pawhin hmun a awm lo a. Assam Rifles luah ram hian Aizawl khawpui than zelna tur kawng tam takin a dal a, AR insawn tur hian bung thar a kai dawn a, hmasawnna chhinchhiah tlak tak a ni," a ti.

Home minister chuan BJP kaihhruai sawrkarin hmarchhak state leh Mizoram a ngai pawimawh tih sawiin kum 10 kalta chhungin PM Modi chuan tum 78 hmarchhak bial a tlawh tawh a, union minister hrang hrangin vawi 700 chuang an tlawh tawh niin a sawi a. Mizorama hmasawnna hnathawh tur leh hmachhawp awmte a sawi bawk.

Chief Minister Lalduhoma pawhin thu sawiin Mizoram chanchinah ni chhinchhiah tlak leh hriatreng tur a ni tawh dawn tih sawiin Home Minister leh Assam Rifles ten an thutiam an tih hlawhtlin avangin lawmthu a sawi a. "Assam Rifles te nen kan thawhhona hi keng nung zel ila ka duh a, kan ram himna leh muanna atana an thawhna pawh chhunzawm zel turin ka ngen a. Mizoram sawrkar chuan kawng engkimah a thawhpui zel dawn a ni," a ti bawk.

ZOKHAWSANGA ASSAM RIFLES SAWNCHHUAHNA TUR HMALAKNA HISTORY:

1917: 1st. Assam Rifle te chuan Aizawl-ah awm hmun an khuar tan a. Aizawl hmun hrang hrang Lammual, Khatla, Zarkawt, Babutlang, Tuithiang Veng, High School tlang, Venghlui, Saron Veng, Zemabawk leh Tuikhuahtlang-ah te an awm thin a ni.

1972-1986: Hemi period chhung hian Union Territory kan nih lai zawng, Mizo Union, PC, Congress te kaihhruai lai, kum 14 chhung khan AR luah ram hmun hrang hrangah hian mi mal eng emaw zat hnenah in hmun ram pek an ni.

1987: Chief Minister Laldenga hun laiin tuna Assam Rifles insawnchhuahna tur hi tihfel a ni a (Memo No LRS/B-40/84-87/89), compensation pawh Rs. 92,59,158 pek chhuah a ni. 

1988: May 31-ah Dengchhuana, Aizawl DC chuan Assam Rifles Commandent Col. Gursharan Singh hnenah Zokhawsang Land Lease a hlan fel zui nghal a (Memo No F.12012/6/85-DC (A) 291 Dated 3/5/88). Hemi kum September 7-ah President's Rule Mizoramah puan a ni.

1989: Congress leh MPC-in Mizoramah Lal Thanhawla hovin sawrkar intawm an siam a. Assam Rifles sawn chhuah chungchangah hmalakna hriat tur a awm lo.

1992: May 28-ah CM Lal Thanhawla’n press conference-ah AR ho chu, ruahmanna hmasa ang ni lovin Sipai Lammual atanga Zokhawsanga insawn lovin Khatla, tuna New Secretariat Complex-ah hian sawn tur a nih thu leh Zokhawsangah Civil Secretariat dah a nih zawk tur thu a sawi a ni (Govt Press Release No 274/92).

1995: August 7-ah Lal Thanhawla'n CM Bungalow-ah press conference neiin, "India ramah khawi khawpui atang mahin sipai sawn chhuak an awm ka hre ngai lo," tiin Zokhawsangah Mizoram University din a nih tur thu a sawi hlauh thung (Kum1989 atanga 1998 chhung, Congress ministry hunlai khan AR ram-ah mi mal 133 lai hnenah inhmun pass (LSC) pek a ni).

1998: Generel Election-ah Zoramthanga kaihhruai MNF sawrkar a a lo piang a. Sawrkar hotuten AR ram mi mal hnena pekchhuah a nih thu an hriat avangin kum 2002 session khan assembly-ah AR ram chhunga mi mal ram neih phal lohna dan an pass ta a. Khatla AR ramah Secretariat Complex dinin sorkar hna thawk mi 600 vel chen theihna tur quarter sak a ni ta bawk a ni.

2006: Deptember 21 khan khatih hun laia Revenue Minister, Lalrinchhana’n AR-in ram an dil belh telin Zokhawsang-ah ram chin siam felin, Land lease (DLL 62 of 2006) pawh AR-Director General, Shillong hnenah a hlan fel vek a ni.

2008: Union home ministry-in Zokhawsanga AR awmna tur siam nan Rs. vbc 145 a sanction hmangin March 12 atangin sipai awmna tur sak hna tan a ni (No VIII. 11014/220/1/AR/Engr-2006 PF IV dated 12 March 2008).

2008: General Election-ah Lal Thanhawla kaihhruai Congress Ministry a lo piang ve leh a. CM Lal Thanhawla pawhin MNF sorkar hma lo lak tawhna Zokhawsangah AR sawn chhuah a nih tur chungchang a sawi ve ta bawk a, hmalakna langsar tia han sawi zui tur erawh a awm ta lo. 

2018: MNF sawrkar a lo a piang leh ta a, election manifesto zinga AR sawn chhuah chu tihpuitlin a nih theih nan theihtawp a chhuah zui leh nghal. 

2019: Hemi kawnga hmalakna kal zelah Union Ministry of Home Affairs chuan Mizoram chief secretary hnenah February 19, 2019 khan office memorandum urgent thawnin May, 2019 ral hmaa Assam Rifles chu Zokhawsanga insawn chhuak tura hriattirna a pe a ni (F.No. 27013/02/2019-PF IV (CF-3449062). 

2023: April 1-ah Union Home Minister Amit Shah chuan Zokhawsanga AR hmun thar hawnna a nei a, Laldenga Cultural Centre sak tur nen a hawng a nih kha. 

2024: October, 23-ah AR sawnchhuahna tura inremna (MoA) chu New Delhi Mizoram House-ah sign a ni. Mizoram sawrkar aiawhin Vanlaldina Fanai, ICAS, Commissioner & Secretary to the Govt. of Mizoram leh Assam Rifles aiawhin Lt. General Vikas Lakhera, AVSM, SM, Director General of Assam Rifles ten hming an sign.