ZALEN July 9, 2025 : ZPM chuan Education Minister Dr. Vanlalthlana'n ZPM chhung inkhawm Dt.7.7.2025-a a thu sawi, MSU-ten Quality Education Humhalhna Kawngzawh an huaihawt chungchangah; Zirlaite thahnemngaihna faka Mizoram zirna siamtha tura mipui an tan tlan a pawimawhzia a sawi chhuak kha ropui an ti a. Kalphung thar mipui sawrkarah Aikal lak tihbo tuma Minister-in theihtawp a chhuah te, a tlingte chauh zirtirtu atan lak an nih zel dawn thu a sawi te leh Kai App hlawhtlinna a hmu chho zel te hi lawmawm an ti.

ZPM chuan, "Lalchhandama Ralte, MLA leh School Education Minister hluiin unqualified teacher te ban an nih theih nana MSU-te kawng a zawh pui kan hmuh khan, a hun laia advertisement awm lova zirtirtu lak bakah; MR teacher unqualified 133 a lak chungchangah te a piangthar ta niin kan hria a. ZPM sawrkarin unqualified teacher te chungchanga hma a laknaah pawh sawrkar thlawp zawnga a kal ngei kan beisei," a ti.

"MSU ten ban tura an phut, unqualified part time Asst. Professor mi 29 te bakah, unqualified contract Asst. Professor, college danga unqualified part time Asst. Professor la awm te (Mizoram Polytechnic, Lunglei leh Mizoram Law College) hnenah, hna zawng mekte hmakhaw ngaia Show Cause Notice pe ngam sawrkar kan nei hi vannei kan inti hle," an ti bawk.

Sawrkar hmasate hmalakna dik tawk lo avanga vawiina harsatna an tawh mek siamtha turin ZPM sawrkar chuan hma a la zel dawn a, chutiang tur chuan ZPM Sawrkar chuan zirtirtu qualified chauh a la zel dawn a ni. College zirtirtu qualify lo lak te, MR Teacher leh Samagra Teacher qualify lo lak te pawh Sawrkarin a chinfel thuai an ring a. Huaisen taka Minister hmalakna te hian zirna siamthat kawngah leh, thalai lehkhathiam zir chhuak mekte tan rah duhawm tak a chhuah ngei an beisei an ti.