ZALEN, Oct. 26, 2024: Mizoram UPC kohhran hmeichhiate chuan buhfaitham an hralhna thin man chu Rs. 5-in an tito dawn.

Mizorm UPC Tanpuitu Hmeichhe Pawl, Ladies Auxiliary Department (LAD) chuan Zirtawpni zan atang khan Ruantlanga Rephidim tia an vuah pandal-ah inkhawmpui lian vawi 28-na an hmang mek a, Inrinni chhuna ro an relah buhfaitham chungchang pawh hi a tel.

Unaunu RMS Dawngkimi, President, General LAD kaihhruaia pandal-a rorel inkhawmah hian agenda 38 an ngaituah a. Buhfaitham an hralhna thin chu Rs. 5-a tisangin Rs. 15-a an hralh thin chu Rs. 20-in an hralh tawh turin thutlukna an siam a ni.

H. Laltanpuii, Treasurer, General LAD-in kum 2025 budget pharhin Rs. 29,00,000 chu an pawm a, General LAD hmingin Zoram Medical College (ZMC)-a Poor Fund atan Rs. 50,000 pek ni se a ti bawk.

Mizoramah hian sawrkarin ration buhfai (card var/Non-National Food Security Act) man chu October atang khan a tisang a, October thla tira ZALEN-in kohhran thenkhatte a biaknaah buhfaitham hralhna chungchangah hian thutlukna an la siam hlawm loh thu an lo hrilh tawh.

Tihsan hnuah ration card varte tana ration buhfai khul man chu kg. khatah Rs 30 a ni tawh a. National Food Security Act hnuaia tel lo, ration card varte tana buhfai man tihsan chungchangah hian Food, Civil Supplies & Consumer Affairs (FCSCA) department chuan September 24, 2024 khan hriattir a chhuah.

Retailer-ten kudam atanga card varte tana buhfai an khulna man tur chu quintal khat Rs 2,850 a ni tawh dawn a, card var neite buhfai khul man a san rual hian retailer-te lawmman pawh Re. 0.50 atangin Rs 1.50-ah tihsan a ni a. Card pawl leh card eng neite buhfai man erawh tihpun a ni lo.

Ruantlanga LAD inkhawmpui hian Pathianni zan thleng a awh dawn a, mi hrang hrangin thuchah an sawi ang.