Utah state, US-a school district pakhat chuan pawl hniam lam, elementary leh middle school-ah Bible chu ‘tawngkam mawi lo leh tharum thawhna’ a lan tam avangin ken leh chhiar an khap.

Nu leh pate atangin King James Bible-ah thu chuang tam tak chu naupangte hriat atana him lo nia complaint a luh hnuah khap a ni.

Utah-a Republican sorkar hian kum 2022 khan sikulah ‘mipat hmeichhiatna hmanna lam kaihhnawih (pornographic) leh thil tha lo’ tar lanna lehkhabute a lo khap tawh.

Heng lehkhabu an khapte hi a tam ber chu mipat hmeichhiatna lam hawi thil leh mihring nihna (identity) tar lanna lam a ni.

Bible hi US-a conservative rorelna state-ah te chuan a chhunga thu inhnial theih tak tak - LGBT dikna chanvo leh chi inthliarna lam avangin khap duhna a lian hle tawh a. Hetih lai hian Texas, Florida, Missouri leh South Carolina-ah te chuan khap duh lohna a langsar viau bawk a. Liberal state thenkhatah chuan sikul leh library thenkhatah a chhunga chi inthliarna lam thu a awm tiin an lo khap tawh bawk.

Utah-a thutlukna hi kar liam ta khan Salt Lake City hmar lama Davis School District-in a siam niin December, 2022-a complaint an dawn bawhzuina a ni.

Thuneitute chuan an lehkhabu dahna chhuara Bible bu sarih/riat vel chu an la bo tawh tih an sawi a, a chhung thute chu zirlaite hnenah tihrik a ni ngai lo niin an sawi bawk.
    Committee hian sikula Bible khap a nih chhan tak bung leh chang, ‘tawngkam mawi lo leh tharum thawhna’ tihlanna tak erawh an sawi lang lem lo thung.