Barcelona-a an awm dun laiin Lionel Messi leh Sergio Busquets te khan kum 13 chhung zet dressing room an intawm a, vawi 567 zet an khel dun bawk a, inngainatna tham zet an inkawp.

Catalan club-ah an awm dun loh hnuah pawh an inbepawp a, chhungkua leh mi mal pawhin eng eng emaw an la tiho thin bawk.

Argentina captain hian Paris St-Germain chhuahsanin US-ah Inter Miami a zawm dawn tih a chiang tawh a, a thianpa hian a hnung a zui dawn tih sawi a awm mek a, a thian dangte hming pawh a ri.

Busquets hian Barca a chhuahsan dawn tih May thlaa a puan hnu lawkah pawh khan Messi-a hian thu ngaihnawm takin a thianpa thlah pahin a lo chawimawi tawh.

“Khelmualah chuan 5 ni mah la, player leh mihring mihrinnaah chuan 10 i ni, Busi,” tiin Twitter-ah a tar lang a. A kal zelna tura duhsakna a hlan rualin, “Khelmual chhung leh pawna ka tana i tih zawng zawng avangin ka lawm a, hriat reng tur hun tam tak kan hman dun nuam leh danglam bik tak takte kha a awm reng tawh ang,” a ti bawk.

Champions League nomawi pathum, La Liga nomawi pariat leh Copa del Rey vawi sarih la dun tawhte hi kum 2021-a Messi-a’n Paris a pansan hnuah pawh an inkawm zui zel a. April thla maiah pawh khan Barcelona khawpuiah ngei an khelhpui thin tho, Jordi Alba te chhungkua nen, chhungkaw thuma zanriah an kilho pawh hmuh an la ni.

Busquets pawh hian a thianpa hi a fak nasa thin a, “Messi hi ka thian a ni a, khawvela player tha ber a ni,” tiin nikumah khan a sawi a, hei pawh an khelh dun tawh lo hnu daihah tho a ni a. Khelmual intawm tawh lo mah se an inhnaih hle zel tih a chiang.

Tunah erawh uaithla lam an pan ve ta a, Messi-a chuan Middle East-a Al Ittahad-in sum tam mangkhenga an sawmna hnawlin US a pan dawn tih a chiang tawh a, tunah hian a thiante pahnih hian an zui dawn anga sawi a awm mek.

TyC Sports-in a tar lan dan phei chuan American club hian Busquets chauh ni lovin, Catalan club vanglaia hmuhnawm tling dang pahnih, Alba leh Luis Suarez te thlengin Messi-a kianga khel tura dawr an ni.

England captain hlui, Manchester United leh Real Madrid star thin, David Beckham-a pawhin chanvo a neihna, Inter Miami hian ‘Messi-a kianga khel tur hian Barca-a a khelhpui thinte sawma team din an tum’ niin an tar lang.

Alba leh Busquets hian nipuiah contract hmang zovin Barca an chhuahsan dawn a. Kum 36 mi, Suarez hian Messi-a hmain, kum 2020 khan Camp Nou a lo chhuahsan tawh a, Atletico Madrid-a a khelh hnuah Brazilian club Gremio-ah a khel leh mek.

Player lei leh hralhah hian titi a tam thin tih chu tlang hriat a ni a, Messi-a te thianho chungchangah pawh hian amah ber tih loh hi chu titi a la ni rih tih erawh hriat tel a tha ang.