ZALEN September 28, 2023 : G-20 Summit palaia Mizoram-a rawn kal J.S. Sekhon (A Sekhon Family under One World Energy Corporation USA) chuan Mizorama Hydel Power Plant siam theih ang te hmalak a duh thu a sawi hnuah April 22, 2023 khan Mizoram sawrkar hnenah proposal an rawn theh lut, a kalphung tur leh enfiah ngai te enfiah turin Sekhon Family aiawh te Mizoram-ah an rawn kal thuai beisei a ni.

Vawiina Chanchinthar lakhawmtute a kawmnaah P&E Minister R. Lalzirliana chuan, Sekhon Family te hian sum puktir zawng in emaw an mahni firm-in thawk nghal tur pawhin ruahmnna an siam theih thu hi Mizoram sawrkar an hriattir a, an proposal rawn thawnah hian duhthlan tur chi li an rawn chhawp chhuak a, chung an rawn chhawp chhuah atang chuan Mizoram sawrkar hian Option 2 leh Option 3 chu P&E Department leh Finance Department ten an zirchiang mek a ni, a ti.

Option 2 - Built Own Operate : Proposal an rawn siam ang chuan Hydro Power Plant hi an mahni sum sengin an siam ang a, Kum 99 chhung neiin an enkawl bawk ang. He project atanga power tharchhhuah te hralhna atanga hlawkna hmuh te chu Mizoram sawrkar nen Agreement simain an insem ang, tih a ni.

Option 3 - Build Own Operate Transfer : Hydro Power Plant hi an mahni sum sengin an siam ang a, an sum sen hmuhchhuah hma chu an mahniin an neiin an enkawl ang a. He Project atanga sum sen te hi hmuhchhuah emaw thawhchhuah an nih veleh Hydro Power Plant hi Mizoram sawrkar hnenah a hlan telh leh ang, tih a ni.

Heng proposal ang hian Tuivai HEP 210 MW chu bawhzui tura hmalak mek a ni. he proposal anga hma la tura hmachhawp te, a kal phung zirho a enfiah leh duang turin Sekhon Family atang hian Expert Team an lo kal thuai beisei a ni.