Uttarakhand-a Himalaya tlang vur tlawlhah mi 10 aia tlem lo an thi a, mi eng emaw zatin hliam an tuar bawk. Vur tawlhin a hnawlte hi training lai mi 34 leh instructor mi pasarihte an ni a, police te chuan mi 14 te chu chhanchhuah an nih tawh thu leh Indian Air Force ten chhanchhuah hna an thawh mek thu an sawi.  

Vanduaina tawkte hi Nehru Institute of Mountaineering-a training laite an ni a, Mount Draupadi Danda-2 (5,670m; 18,602 feet) tlanga an lawn haw lam chu vur tawlh hian a hnawl ta a ni. Vanduina thlen hun hi Thawhlehni zing dar 9:30am vel kha a ni a, chhanchhuah hna thawh mek zel a ni. Mahse ruah sur leh vur sur nasa avangin zan lamah chhanchhuah hna hi thawh hleih theih a ni lo a, duh angin hma an la chak thei lo a ni. 

Uttarakhand police chief Ashok Kumar chuan khaw awm danin a zir loh avangin chhanchhuah hna duh anga chaka kalpui a harsat thu a sawi a, vawiin lamah ruang pali lak chhuah leh a nih thu a sawi. A hmain ruang paruk an lo la chhuak tawh bawk a, ruang 10 an hmu tawh tihna a ni. 

Defence Minister Rajnath Singh chuan vanduaina thleng chu pawi a tih thu leh thi chhungte a tawrhpui thu Twitter-ah a tarlang ve bawk.