Aizawl: Mizoram chhunga frontline workers vaccine dawng tura in ziaklut (register) tun dinhmunah mi 27,557 an awm mek a, heng vaccine pe tur hian session 276 mamawh tura chhut niin vaccination team 70 mamawh ni a chhut a ni bawk.

Zirtawp tlai khan Mizoram Chief Secretary Lalnunmawia Chuaungo kaihhruainain SAD Conference Hall, MINECO-ah State Steering Committee on COVID-19 Vaccination meeting neih a ni. Meeting-ah hian Dr. Eric Zomawia, MD (NHM) Mizoram leh SNO, COVID-19 Vaccination ni bawk chuan COVID-19 vaccination an neih dan thlirletna a nei a, Dr. Lalzawmi, SIO, Mizoram chuan Health Care Worker (HCW) leh Front Line Worker(FLW) te hnena Vaccine an pek dan leh 2nd dose an pek dan tur Powerpoint Presentation hmangin a tarlang a ni. COVID-19 Vaccine hi first phase-ah dose 1,8500 dawn a ni a, second phase ah dose 1,6500 leh third phase ah dose 30400 dawn leh tura ruahman a ni.

Mizoram district hrang hrangah vaccination session hi vawi 189 neih a ni tawh a, hei hi chawhruala ni khata session 15 zel nei ang a ni. Covid-19 Vaccine hi mi 16,380 dawng thei tura ruahman a ni a, heng zinga mi 734 te chuan vaccine semna hmun kalin an dawng thei lova, mi 5,375 vaccine la tura kal lo an awm tih tarlan a ni. Tun dinhmunah Health Care Worker vaccination pek thatna ber chu Champhai District niin, 73% hnenah pek an ni tawh a, Kolasib District chuan Health Care Worker 33% hnenah vaccine pe tawhin, Mizoram district-a vaccine pe tlem ber an ni. Adverse Event Following Immunization case hi Mizoram chhungah 307-a awm tawh a, heng case awm zingah hian khawsik, taksa na, luna leh vaccine-a an chiuna laia na nei te an ni tlangpui tih tarlan a ni bawk.

Dr. Lalzawmi chuan vaccination an sem chhuah laia harsatna an tawh te tarlangin, Internet connection thalo te, CoWIN portal chianglo te, vaccine lak hlau te leh vaccine lak nghakhlehte chu an harsatna tawh tam ber a ni thu a sawi. He tih lai hian vaccine hi a tha thei ang ber leh indaihzai thei ang bera sem tuma hmalak a nih thu tarlangin, nitina vaccine sem dan sawi hovin Zoom VC an neih thin thu te leh vaccine wastage atlem theih nan Health Care Worker te chu PHC leh vaccine an semna hmun hrang hranga an koh khawm thin thu a tarlang a. WHO, UNICEF leh UNDP te nena an thawhhona a that thu tarlan a ni.