ZALEN August 19, 2025 : MZP chuan August ni 18, 2025 zana Hnam dang Mizoram luh tum te’n Mizoram Vairengte ILP Check Post-ah buaina an siam an duh lo tak zet a, nimina vai lo luh tumte hi ni dang aia tam fe an nih avangin MZP ngaih a tha lo a, Assam Sawrkar-in Bangladesh Muslim Illegal Migrant hnawhchhuah an kalpui avangin Mizoramah vai an tam taah an ngai a, uluk leh huaisen taka che turin Mizoram Sawrkar an ngen.

MZP chuan Home Minister K. Sapdanga chu a office-ah hmu nghalin August ni 18, 2025 (Thawhtanni) thil thleng hi a sawipui a, Assam-in dan lova an rama awmte an hnawhchhuah mek hi Mizoramin a tawrh theih avangin ramriah Sipai leh Police tam zawk duty dah tur leh Assam atanga lo lut turte chu uluk taka an document-te check tura an duh thu an thlen a. Central Armed Police Force (CAPF) Sipai lak chhuanlam a dan lova vai an lo luh loh nan theih tawpa inven a tul thu thlen a ni a, Home Minister hian theih tawp chhuah a tum thu leh duty pawh an uluk thu a lo hrilh a ni.

August thla chhungin mi 2,573 hnenah ILP pek chhuah niin nimin August ni 18, 2025 khan mi 544 hnenah pek a ni a, August thla chhunga ILP pek chhuah hi chawhrualin nikhatah mi 140 bawr vel zel a nih lai a, nimina mi 544 zet an lo lut thut hi MZP ngaih a tha lo a. Tunhma atanga hnam himna tura MZP in tha a lo thawh tawh thin dan angin harsatna lian zâwk a thleng a nih chuan MZP chuan hnam himna atan theihtawp a chhuah leh zel dawn a, tunlai boruak awm mek hi Mizo mipuite pawhin ngaihven a, sawrkar hmalaknaah leh he thilah hian beng lo chhi ve turin Mizo mipuite an ngen nghal bawk a ni. MZP Headquarters, Sub-Headquarters leh Branch-te pawh vawiin August ni 19, 2025 atang hian ILP pek chhuahnaah a theih ang angin duty-te an tawiawm ve nghal a ni.

Assam sawrkarin Bangladesh Muslim Illegal migrant a hnawhchhuah avanga Mizorama lo lut an awm chuan an chungah eng pawh thleng se MZP chuan mawh a phur dawn lova, a rang thei ang bera inthiarfihlim turin an hriattir a ni. Mizoram a hnam dang vai awmte pawh Bangladesh atanga lo lut an awm leh awm loh tih a rang thei ang ber a dap chhuak vek turin MZP chuan Mizoram sawrkar a ngen nghal bawk a ni.

Pic - ZALEN file photo