Aizawl: Nimin khan Lailapur ah Mizoram leh Assam ramri chungchanga harsatna thleng mek sawiho turin Kolasib DC leh Cachar DC ten inbiakna neih an tum a, he inbiaknaa tel tum Kolasib DC chu Vairengte khawtlang chuan kal phal lovin an dang.

Zalen thudawn danin Kolasib DC leh Cachar DC te DC level inbiakna a awm dawn tih an hriatin Vairengte khawtlang chuan tha an tih loh thu sawiin nimin zing khan DC dang tur hian mipui an inau khawm a, Lailapur kal theihna kawng khan zawng zawngah DC dang tur hian mipui an indah vek a, Vairengte-ah hian kawnglaiahte lirtheia kawngpui dangin mipui an pungkhawm a, Kolasib DC hi an lo dang a, khawtlang hruaitute nen inbiakna nei zui nghalin, mipui pungkhawm paltlang tum lui lo turin khawtlang hruaitute chuan DC hi ngenin, DC hi Kolasib-a a let leh hma chuan mipui hian kawngpui an dang zui nghal a ni.

Mipui pungkhawm hian thuchhuah siamin, Union Home Secretary hova Chief Secretary-te inbiakna anga Mizoramin hma an lak laia Cachar DC thupeka Assam police-ten ei leh bar lak luhna kawngpui, National Highway-a motor an dang chu hriatthiam har an tih thu te, hetianga state pahnih hotute an inbe dawn a nih pawhin Mizoram emaw, Assam-ah emaw ni lovin, state dang (neutral ground)-ah emaw inbiak ni rawh se tih leh, sentral sawrkar hian duhsak bik neiin rorel tawh suh se tiin thuchhuah an siam a ni.