October 25, 2022; Tunhnai September ni 11, 2022, Pathianni zan a Vaivakawn Zohnuai four lane bul a unau mipa pahnih thattu a puh chu police ten manin thubuai an siamsak a, central jail, Aizawl ah dahluh tawh a ni.

Police hotute hnen atanga ZALEN thudawn danin, Salem veng, Aizawl a vuiliam tak unau mipa pahnih Zoparmawia (27) leh Hmangaihsanga (25) te thihna chungchang-ah mi engemawzah thu zawhfiah an nih hnuin, tualthattu a puh hi police te hma ah a inpuang a. 326/22 Under Section 302 IPC leh 330/22 Under Sectoin 302 IPC hmangin thubuai siamsak a ni.

Police hotute sawi danin, tualthahna thlenna chhan hi pawisa chungchang vang niin, tualthattu hian unau mipa pahnih te hi a hran ve ve in kut a thlak a, pakhat zawk chu thingin a lu-ah vuain, pakhat zawk chu bottle in a lu -ah a vuak bakah, bottle kehin a hmai-ah te pawh a nawr niin police te hma ah a inpuang a. Ruang chharna hmun a thawmhnaw awm te Forensic Science Laboratory (FSL) a endik atangin tualthattu hi amah ngei a ni tih nemngheh a ni bawk.

Media hrang hrang a tarlan a nih tawh angin, September ni 11 zan leh a tuk Thawhtanni tlai ah Zoparmawia te unau ruang hi Vaivakawn Zohnuai 4 lane bul luikawr ah chhar an ni a, tute nge an nih hriat an nih hnuah, an pa chenna Salem veng, Aizawl Thlanmual ah vui an ni.