ZALEN July 20, 2025: Zoram Peoples’ Movement (ZPM) party, Val Upa Council (VUC) Chairman Lal Fakzuala, IAS (Retd)-in Mizoram sawrkar leh ZPM party nen thawhhona tha tak an nei tih sawiin, thawhhona tha leh zual nei turin ruahmanna an siam mek thu ZALEN a hrilh.

ZALEN-in a biaknaah VUC chairman chuan VUC din tirh a nih atanga tun thlengin, an hmalakna leh an hnathawh dan an tlangzarh ngai lo tih a sawi a, hetihlai hian sawrkar leh ZPM party lam nen thawhhona tha tak an nei niin a sawi.

“Sawrkar leh party lam pawhin VUC an zahder thiam niin kan hria,” tiin a sawi a. “Theihtawp chhuahin sawrkarin policy leh manifesto a neihte a tihhlawhtlin dan VUC-in a vil a, an tihhlawhtlin dan leh ngaihsak zui dante a en zui thin,” a ti bawk.

VUC chairman chuan, ZPM party chu an vawi khat sawrkarna a la nih avangin thawhho dan hrim hrim pawh inzir chawpin an ti chho nia sawi bawkin, hmalak zel dan tur chak zawkte pawh an ngaihtuah chho mek niin a sawi. "Tun aia chak leh tha leh zual zawka sawrkar nen a thawhho zel kan tum a, chutiang chiah chuan party nen pawh tha zawk a thawhho chhoh zel kan tum," a ti bawk.

July ni 17, 2024 a ZPM Legislature party, VUC leh ZPM General Headquarters elected office bearer te chief minister's office conference room-a an inhmuhkhawmna ah, ZPM Legislature Party leader Lalduhoma, chief minister chuan, ro an rel danah tih sual palhte an nei thei tih sawiin, chu'ngah chuan VUC an mamawh thu a sawi a, zilhhauh an ngaihnaah rang taka thurawn pe turin VUC te a ngen lo tawh a mi.

CM Lalduhoma chuan, VUC-in fim takin sawrkar hotute an uap tlat tih sawiin, "Kan tlan chak lutuk tur min veng a, kan kal muang lutuk tur min nawr a, kan bana min kaih tlat avangin ZPM party tan an hlu hle. Kan rorel dan leh thu kan tihtluknaahte 100%-in kan ti fuh vek seng lo mai thei, tih sual palhte pawh kan nei ve ang, chu'ngah chuan kan mamawh tur chu VUC hi in ni. Zilhhauh kan ngaih hunah rang takin rawn che u la, in thurawn hi engtik lai pawhin kan mamawh reng a ni," tiin a lo sawi tawh bawk.