Detroit Pistons chuan a zawna inkhel vawi 28 zet an tlawmna an titawp thei ta hram a, Toronto Raptors an hneh hlauh.

Cade Cunningham-a’n point 30 thawk chhuakin vawi 12 a thiante a siamsak bawk a, Pistons hian 129-127-a hnehna changin NBA-ah October 28 hnua an chak leh hmasak ber a ni.

A zawna vawi 28 zet an tlawm khan NBA chanchina chak lo zawn rei ber record an nihrual a Raptors lakah hian Pathianni tuk khan tlawm leh ngat sela chuan NBA-a chak lo zawn rei ber an nih dawn piah lamah US-a infiamna lian zinga tlawm zawn rei ber record an an nihrual thei dawn a, an pumpelh ta hlauh a ni.

US infiamnaa tlawm zawn rei ber chu NFL team Chicago Cardinals niin tunah chuan Arizona Cardinals an inti tawh a, 1942 leh 1945 inkar khan vawi 29 zet an lo tlawm zawn tawh a ni.

An rama Inrinni zan inkhelah hian Bojan Bogdanovic chuan Pistons tan point 19 a thawk chhuak a. Jalen Duran-a’n point 18 leh rebound vawi 17 lain Kevin Knox II chuan point 17 a thawh bawk.

Inkhel dangah LeBron James chuan a pianchamah a team hnehna a chanpui zo lo va, Los Angeles Lakers chu 108-106-in Minnesota Timberwolves lakah an tlawm.

Kum 39 tling chiah, James hian point 26 thawk chhuakin Timberwolves tan Anthony Edwards chuan minute 38 chhungin point 31 a thawk chhuak hman bawk.

Indianapolis-ah kum 33 chhunga a hmasa ber atan Tyrese Haliburton chu a zawna point 20 thuna assist vawi 20 nei thei leh hmasa ber niin Indiana Pacers chu New York Knicks lakah 140-126-in a chakpui.

Point 22 vawm lutin assist vawi 23 a nei bawk a. Hall of Famer pahnih, Magic Johnson leh John Stockton te chiahin NBA chanchina an la tih theih chu a ti thei ve ta a ni.

Luka Doncic-a’n Dallas Mavericks chu 132-122-in Stephen Curry-a khelhna, Golden State Warriors lakah a chakpui bawk a. Chicago Bulls leh Utah Jazz ten an hmachhawn ve ve an hneh bawk.