August 10, 2022; Sawrkar sum harsat vanga sawrkar hnathawk ten a hun a hlawh an lak theih loh hnuah, vawiin atangin treasury office hrang hrangte chuan sawrkar hnathawk (regular) te July thla hlawh an pe chhuak tan nia thudawn a ni.

ZALEN thudawn danin, Mizoram sawrkar a finance department chuan sawrkar hnathawkte hlawh pechhuak tura phalna a pek angin, treasury office hrang hrangte chuan vawiin atangin hlawh an pe chhuak tan a, hetihlai hian hlawh hi vawiin lam a an account a lut hman te, zanin lamah te, naktuk lam thlenga lut turte pawh a awm dawn nia hriat a ni.

Muster roll leh workcharged te July thla hlawh chu August ni 5, 2022 atang khan pek chhuah a lo ni tawh nia thudawn a ni bawk.

Sawrkar laipui thupek angin, Mizoram sawrkar chuan tun hnai khan CSS sum, March ni 31, 2022 hma lama dawn tawh, RBI a state account a awmte chu a hmangtu tur department (state nodal agency) hnenah an pe chhuak a, hemi vang hian sawrkar sum harsatna a thlengzui ta nia ngaih a ni. Finance department tarlan danin, CSS sum hi kar hnih chhungin cheng vbc. 610.69 pek chhuah a ni.