Engkima Chawngthu
Chhiahtlang

Election Commission of India (ECI) thu chhuah No. ECI/PN/37/2021 Dated 26th March, 2021 leh The Mizoram Gazette No. 576/EXTT/2021/SDR/Vol.I Dated 24th March, 2021 te chuan Serchhip Bial Bye-Election lo awm tur denchhen hian mipui ngaihdan lakkhawmna leh chutiang lam kaihhnawih reng reng tar chhuah emaw tih chhuah a khap a. He khapna thu pek hian ni 27th March, 2021 (Inrinni) zing lam dar 7:00 AM atanga ni 29th April, 2021 (Ningani) tlai lam dar 7:30 PM thleng a huam a ni.He thupek chhuah a nih hma leh he thupek in a huam chin hma March thla tir lam khan Serchhip bialah hian mipui ngaihdan (public opinion) lakkhawm a ni a. He zirchianna hi ECI thupekin tarlan a rem tih loh avangin he thupek huam chhung zawng chu thup bo rih a ni a. Tin, he zirchianna hi party tinten campaign beihpui an thlak tak tak hmaa neih a nih avangin he zirchianna a hmuhchhuah te hi zaah za (100 per cent) a dik vek dawn tihna a ni lo. Nimahsela, he zirchianna in a tarlan te hi a dik thui hle ang tih erawh rin a ni.

Zirchianna mipui ngaihdan (Public Opinion): He zirchiannaah hian zawhna chi hrang hrang siam a ni a. Zawhna zawng zawngte tarlan a remchang loh avangin a then chauh kan tar lang dawn a ni. Mipuite hian eng party nge an âwn ve deuh tih zawhnaah chuan ZPM âwn hi an tam ber a, a dawtah MNF, a pathumnaah INC-in an zui leh. MNF leh INC inthlauhna hi a nasa lem lo a; ZPM leh MNF inthlauhna erawh a tam deuh.

Party-a inziak lut leh inhmang langsar tak hi chu kan zirna in a huam atangin 27 per cent vel bak an ni lem lo a; 66 per cent chung lam hi langsar taka party thil tihna vela tel ngai lo leh party-ah pawh inziak lut lem lo te an ni. Hetah hian 66 per cent chung lamte hi neutral tiin an sawi theih a. Amaherawhchu, neutral âwn lam nei leh neutral tak tak, âwn lam pawh nei lem lo hi an la awm hrang leh a ni.

Inthlan lo awm chhan Pu Duha (ZPM) bân a nih danah Bân a phu nge phu lo tih zawh a nih a, hemi zawhna chhangtu mipui tam zawk te chuan ‘ban a phu lo’ an ti a. ‘Ban phu lo’ ti zingah hian party-a inziak lut lo leh inhnamhnawihna nei lem lote hi a tam zawk an ni. Hetih lai hian party-a langsar taka inhmang, ‘Bân a phu lo’ ti tawk hi an awm ve tho bawk.

MLA Fund hman dan chungchangah Pu Duha (ZPM) hian Fund a hmang tha thawkhat tih hi mipui tam zawk chhanna a ni a. Chhangtu mipui zingah MLA fund a hmang tha lo ti hi chu 14 per cent vel chauh an ni; a dang zawng hian Fund a hmang tha hle an ti. Mipuiin eng party nge an âwn ve deuh tih zawhna nen kaihkawp dawn chuan party dang mi leh sate zingah pawh Pu Duha hian MLA Fund a hmang tha ti pawl an awm ve tho tihna a nih chu.

Inthlan apiangin sum leh therhlo eng eng emaw sem leh intiam thawm thang hi hriat tur a awm fo a. Chumi tireh tur leh chin tawk siam turin Mizoramah chuan MPF-te hial kan din a ni. Heng thil sem leh intiam te hi a tul reng em tih hi hre turin zawhna, ‘Inthlannaah sum leh therhlo sem hi tul/tha i ti em?’ tih zawh a ni a. He zawhna chhannaah hian a chhangtu zawng zawng atanga 18 per cent chauh hian sum leh therhlo sem hi tul an ti a, a dang zawng (a tam zawk) 76 per cent-te hian inthlan dawn a sum leh therhlo lam chi reng reng sem hi a tul an ti lo.

Bye-election a nih angin khawvar hnua inthlanna neih a ni a; rorel lai nge eptu pawl thlan tlin fuh emaw tha zawk ang? He zawhna hre tur hian ‘Bye-election lo awm turah hian rorel lai pawl (ruling party) thlan tlin kher a tul i ti em?’ tih hi zawh leh a ni a. Rorel lai pawl thlan tlin kher a tul ti lo hi chhangtu mipui tam zawk 52 per cent an ni a; rorel lai thlan tlin a tul ti hi 16 per cent an ni a; ngaihdan fumfe nei thiam lo leh chhang thiam chiah lo hi 26 per cent an awm ve bawk. Hetah hian ngaihdan fumfe nei thiam lo zawng zawng te hian ‘rorel lai thlan tlin kher a ngai’ emaw ‘a tul’ ti ah lo ngaih luih sak ta pawh ni ila, rorel lai pawl thlan ngai ti lo hi an la zat chuang lo a ni. He mi awmzia chu campaign beihpui thlak laiin thil danglam tak a thlengte a nih lem loh chuan rorel lai an nih vang ngawr ngawrin MNF hi an tlin a rinawm loh. 

Rorel lai a tlin loh chuan tunge tling ang? Mipuiin rorel lai pawl thlan tlin kher a tul an tih loh a, mipui tam zawkin Pu Duha bân a phu lo an tih bawk a, Pu Duha MLA Fund hman danah an lungawi chuan Pu Duha (ZPM) bawk hi tling leh tur chiang sa a ni.

Danglam thei thil: Sawi tawh angin he zirchianna hi party tinten campaign beihpui an thlak tak tak hma a neih a nih avangin thil danglam thleng thei a la awm nual a. A chhan chu campaign tak tak hnua ‘tu nge vote tur’ tih thutlukna siam ve thei chauh an awm vang a ni. Zawhna pakhat – ‘Eng tik lai velin nge vote tur i tih chian thin?’ tih zawh a ni a. Hemi an chhan dan atanga a lan dan chuan March thla tir lam khan a chhangtu mipui 53 per cent-te kha chuan an vote tur an ti chiang tawh a; 6 per cent-te hian campaign beihpui thlak tak tak hnuah an vote tur an tih chian thin chauh thu an sawi bawk a; 6 per cent dangte hian vote thlak tak tak hma ni 2/3 velah an vote tur an chiang chauh zel an ti leh a; 6 per cent dang leh te hian vote thlak niah an vote tur an chiang chauh zel an ti leh bawk a; vote tur chungchang a thutlukna siam hun hre mumal thei lo hi 21 per cent vel lai an awm leh bawk. 

Hemi awmzia chu zawhna chhangtu mipui zahve dawn lai hian he zirchianna neih lai March thla tir lam khan an vote duh zawng emaw an vote tur an la tichiang hleithei lo a. Heng mite hian campaign beihpui thlak lai emaw a hnuah emaw an vote tur an tichiang chauh dawn tihna a nih chu. Hei hi thil awmdan a nih avangin heng mipui thutlukna siam mumal thei lote hi tu party berin nge rut/hui khawm ta ang?

Khaikhawmna: Hetiang zirchianna hi kum 2018 inthlanpui khan Tuichang bialah neih a lo ni tawh a; AMC inthlan 2021-ah khan Ward No. VII leh XIX-ah te hian neih a lo ni tawh bawk. Heng zirchianna hmasaah te hian dik takin a chak leh chak lo tur lo hmuhchhuah lawksa a ni tawh a, tun tumah hian thil danglam thleng thei leh thleng lo thei a ni. Mizoram a bye-election neih tawh reng rengah eptu pawl aiin rorel lai chan a tha fo a; vote thlak erawh an tlem tlangpui thin. Tun tum inthlan chu vote thlak an tam avang hian thil danglam thleng thei a awm a, a chhan chu neutral tak tak kan tih te hian vote thlak an phur hle tihna a ni. Vote tla tam hi tunge chhawr ta ang? He zirchiannain a hmuh dan chuan Pu Duha (ZPM) a chak ang a, Pu Zawma (MNF) hian a dawt ang a, Pu Tlana (INC) hi pathumna tur a ni. Pu Hriata (BJP) leh Pu Ruata (PC) te hian an dawt leh ang a, Pu Edena (IND) emaw NOTA emaw hian hnung an dawl ang.