Tualchhung

Vawiinah Serchhip-ah vote chhiar dawn

Admin - May 02, 2021

Vote thlakna khawl te hi DC Office-a Strong Room-ah venhimna khauh tak hnuaiah dah mek an ni a, inthlanna a vote tla te chhiarna tur atan hian Serchhip DC Office chhawng chung bera DC Conference Hall-ah Counting Hall pakhat siam a ni

Aizawl: Serchhip bial Assembly bye-election a vote tla te chu tukin zing dar 8:00 atangin chhiar a ni dawn a, inbuatsaih-na pawh peihfel a ni tawh.

ZALEN thudawn danin April 17, 2021-a Serchhip bial bye-election a vote thlakna khawl te hi DC Office-a Strong Room-ah venhimna khauh tak hnuaiah dah mek an ni a, inthlanna a vote tla te chhiarna tur atan hian Serchhip DC Office chhawng chung bera DC Conference Hall-ah Counting Hall pakhat siam a ni a, Vote chhiarna dawhkan hi pasarih a awm dawn a, vote hi kual nga (round 5) chhiar tur niin, EVM te chhiar a nih zawhah VVPAT panga chu ECI dan anga EVM a vote tlate nena khaikhin chunga chhiar leh tur a ni ang. 

Round tin result te hi RO's Media room leh Bye Election Media Centre kaltlangin media mite hnenah rang taka pek chhuah thin a ni ang.

Serchhip bial Assembly bye-election a Vote tla te chhiar tur hian Counting Supervisor mi 10 leh Counting Assistant mi 12 ruatchhuah an ni tawh. Vote chhiar ni ah hian Covid19 hripui leng mek laka himna tur dan Election Commission of India leh Mizoram sawrkar thupek hrang hrangte tha taka kenkawh tur a ni a, hei vang hian counting hall mai ni lovin Counting Centre/campus (DC Office huam chhung) a vote chhiar nia lut thei tur chin hi uluk taka thliar fel niin, phalna nei chauh helaiah hian luh theih a ni dawn a ni. 

Counting hall leh a chhehvel venhimna hi security thuah thuma kalpui tur a ni a, phalna nei te chauh luh theih a nih dawn avangin phalna lehkha nei lote chu result ngaichanga Counting Centre (DC Office Complex) pan lova Media kaltlanga lo ngaichang zawk tura ngen an ni.