Aizawl: Vawk natna chi khat African Swine Fever (ASF) vanga vawk suat te zangnadawmna vaibelchhe 11.6 pek a ni tawh a. Hetih lai hian Fecember 2022 hnu lamah African Swine Fever vanga vawk thi an awm tawh lo.

Animal Husbandry & Veterinary Department thawktute sawi danin African Swine Fever chungchangah Mizoram tluka record nei tha India ram state dangah an awm lo tih an sawi a. Vawk suat zangnadawmna (compensation) pawh Mizoram chauhin sawrkar laipui atangin a dawng nia sawi bawkin vawk suat (cult) te zangnadawmna sum hi sawrkar laipui leh Mizoram sawrkar chuan zat leh zat (50:50) in an intumsem niin an sawi bawk.

AH&Vety department chhinchhiah danin African Swine Fever vang hian kum 2021 khan Mizoramah vawk suat 12568 awmin kum 2022 ah vawk 10575 suat leh an ni a, vawk neitute zangnadawmna atan hian Rs. 11,69,94,000 pekchhuah a ni. Vety department chhinchhiah danin African Swine Fever natna avang hian kum 2021 ah vawk 33417 an thi a, kum 2022 ah vawk 12391 thi lehin vawk thi vanga hloh hi 2021 ah vaibelchhia 334.14 leh 2022 ah vaibelchhia 200.38, a vaiin vbc 534.52 niin an chhut a ni. African Swine Fever hrileng thawhkhatna kum 2021 hian Mizoram chhunga khua 272 a nghawng a, nikum 2022 hian khua 149 a tibuai bawk.

* African Swine Fever natna hi kum 1921 khan Kenya ramah hmuh tan a ni.
* ASF hi kum 2020 khan India ramah hmuh tan a ni.
* Mizoramah chuan 2021 khan Lungsen khuaah ASF vanga vawk thi an awm tan.
* December 6,2022 atangin Mizoramah ASF vanga vawk thi an awm tawh lo.
* Khawvel puma mihring ten sa an ei zinga 35% hi vawksa a ni.
* Mizoramin kumtin vawksa metric ton 6053 a mamawh nia chhut a ni.