Aizawl July 15, 2024 : Centre For Environment and Social Justice (CESJ) chuan Vawk pul hri (African Swine Fever) vanga vawk thi sawngbawl chungchangah Mizoram District tina Deputy Commissioner (DC) ah July 13, 2024 khan lehkha an theh lut.

Mizoram pumah Vawk pul hri leng mekin, vawk tam tak an thi tawh a. Mi thenkhat tan chuan Vawk vulh hi an eizawnna a ni a. Vawk thi an sawngbawl dan kawngah mumal zawk a kal pui an mamawh tih hriain hetiang hian DC tinah ruahhmanna an thlen:

Aizawl DC hnenah Tlawng luia vawk thi ruang paih a nih vangin Aizawl khawpuia cheng, PHED ten Tlawng lui tui an lak ring zawng zawng typhoid hridanna a thlawna pek ve ni se, an ti

Khua leh veng tina vawk vulh zawng zawngte VC/LC te hriatpuinain registration kimchang taka tih vek ni se. Hetah hian mahni huan leh farm-a vulhte pawh a bialtu LC/VC-ah zel registration tih ni se. Heng registration nei lote chuan khawiah mah an vawk note leh a sa an hralh chhuah theih lohna turin certification system hman ni se.

Vawk thi reng reng chu VC/LC te hriatpui loha phum leh tih ral phal loh ni se. Vawk hi thenkhat tan chuan an ei zawnna tak tak a ni a, an ei zawnna hnar a chah hnu pawha dan anga an vawk thi phum thlap thlap thei lo an lo awmin, a harsa zualte tan tala an vawk thi phumsak dan hi sawrkarin ruahman se.

Vawk hri len lai chuan record leh a tak a inmil leh inmil loh hi a lo berah kar khat danah tal verification ti turin sawrkar lamin inspection nei thei se.

Mi thenkhat ten an vawk vulh thi dai hnaiah leh kawr leh luiah an paih a. A bikin Aizawl khawpuia vawk vulh, an vawk thi phûmna tur ram neilo ten an paih mai zel niin a lang bawk.

Heng hian tuitlanah harsatna leh hriselna kawngah nghâwng thalo a neih theih dawn avangin ruahhmanna tha zawk nêna kalpui ngei a nih theih nan DC ten hma lâksak heuh tûrin CESJ chuan an beisei a ni.