Aizawl: Cheng Nuai 2,500 chuang virvelna Mizorama kuhva chingtute thar chhuah, kuhva rah hmanga sumdawnnaah hnam dang sumdawngten Covid hri leng vang leh ramria buaina vangin harsatna an tawk mek a, Mizoram rawn luh an chak zek zek tawh ni a thudawn a ni.

Hachhek bial Kuhva Chingtu Pawl president Lalzawna Pachuau-in ZALEN a hrilh danin, Hachhek bial atangin kum kalta chhung khan kuhva rah an hralhna atangin cheng vbc. 17 vel an hmu a, an kuhva rah rawn leitute chu Karimganj district chhunga hnam dang sumdawngte vek an ni.

Kuminah erawh Covid leh ramria buaina awm mekin harsatna a thlen a, Mizoram rawn lut tur, permit pek fel tawhte pawh rawn lut thei lo an awm. Anmahni leh anmahni an indang a, an bialtu MLA leh MP te hnen thlenga zualkoah an invau mek. A tul dan a zirin chung miten Tripura atanga Mizoram an rawn luh dan tur Hachhek bial Kuhva Chingtu Pawl chuan ngaihtuahpui an tum.

Kum dangah chuan kuhva rah leia Mizoram rawn lut hnam dang 200 vel an awm thin a, kuminah mi 150 in permit an dil a, Home department-in tam an tih avangin a thawh khatnaah mi 60 an chah chhuak mek a, chung mite chu quarantine zel an ni.

Hnam dang sumdawng, Mizorama kuhva rah rawn leituten pawisa pe lawka leisak tawhte an neih avangin rawn chhuah an châk zek zek tawh nia thudawn niin, Covid leh ramri-ah buaina awm lo ni sela chuan July-August velah an inlei zo vek tawh thin.

ZALEN zawhna chhangin Bikhawthlir Kuhva Chingtu Cooperative Society president Thangtama chuan, an kuhva rah leitute chu Karimganj leh Bagha lam mite an nih deuh vek thu leh chung mite chuan Mizoram atanga an sum lak luhna a kiam mek ni a an hriat avangin an chal a beng thawk tawk tawh ni a report an dawn thu a sawi.

Bilkhawthlira kuhva chingtute thar chhuah hi hnamdang sumdawng ten pawisa pe lawkin an khar sa nual tawh a, hetihlai hian Covid leh ramri a buaina awm avangin Mizoram anla rawn lut mumal thei lo. Chung mite Mizorama an rawn luh theihna tur chu Home department-ah dil tum mek a ni.

Bikhawthlir Kuhva chingtu Cooperative Society-ah hian member 335 an awm mek a, member ni lote nen kuhva ching a ei zawng chhungkaw 600 vel an awm. Bilkhawthlirin kum kalta a kuhva rah atanga sum an lak luh chu cheng nuai 489 vel a tling. Kuminah hian hnam dang sumdawng mi 46 velin kuhva rah an rawn lei dawn a, registration pawh tihfel tawh a ni.

Vairengte Kuhva Chingtu Cooperative Society president Lalthan-kima pawhin an member mi 560 vel zinga a tam zawkin an kuhva rahte pawisa dawng lawkin an hralh tawh tih sawiin, a leitu hnam dang sumdawngte erawh an la rawn lut hlei thei lo tih ZALEN palai a hrilh a, chung hnam dang sumdawngten permit an neih theihna tur chuan hma an lak mek thu a sawi.

Mizorama kuhva rahte hi lawh a hun chho tan mek a, hmun tam takah kuhva rah thenkhat lawh hun tawhte chu a tla tan mek tawh niin Hachhak, Bilkhawthlir leh Vairengtea kuhva chingtu pawl hruaitute chuan ZALEN an hrilh.