Aizawl: Saitual atanga Saichal inkar kawng chu cheng vbc. 31.844 sengin black top hna thawh a ni dawn a, hemi atana E-tender pawh Zirtawpni khan tihchhuah a ni.
Lengteng bialtu MLA L.Thangmawia chuan kawng siamthat anih tur thu hi nimin khan a pisa ah a sawi a. Saitual-Saichal kawng chu kum 2006 khan laih zawh a niin he kawng hi black top a ni lo a, thal lai chuan motor tlan thei mahse fur ah chuan kawng a diak avangin an tlan thei lo tih sawiin, "Kawng pawimawh tak a ni a, Manipur lam kalna kawng anih bakah Lengten bial khaw tam zawk leh Hnahlan tlangdung tan a pawimawh a. He lai kawnga kal hian tuna kawng pangngai aiin km 34 velin a tawi zawk bawk a. Black top zawh anih hun chuan mipui ten tangkai takin an chhawr thei dawn a ni," a ti a. He kawng hi blactop zawh anih chuan Manipur state bakah Mizoram chhunga khaw 20 chuangin an chhawr tangkai thei dawn niin a sawi bawk.
L.Thangmawia chuan Saitual-Saichal kawng blactop anih theihna atan hian Chief Minister Zoramthanga leh Transport Minister TJ Lalnuntluanga ten theihtawp an chhuahpui avangin lawmawm a tih thu a sawi a. Kawngpui enkawl hna chu National Highway & Infrastructure Development Corporation Ltd. NHIDCL) in an thawk dawn niin a sawi bawk a. Ruahman dan chuan hna tan atanga thla 6 chhunga zawh tur a ni.