Kum khata vaibelchhe 40 hlawh tur chuan min sawm ve ngat se chuan kan 'yes' rang viau mai thei. Mahse Alakh Pandey hi chuan a hnar a, kum hnih chhung lekin cheng vaibelchhe 4000 zet a thawk chhuak ta zawk!

Alakh Pandey hian Kanpur-ah engineering a zir a, mahse zir zo loin final year-ah a ban san. An chenna Allahabad-ah tuition pein bul a tan a, a hlawh lak hmasak ber chu Rs. 5,000 a ni. A talent a that em avang leh zirtirna a pek thiam em avangin zirlai naupang ten an duh em em a, a tan kawl a eng chho tan ta. Forbes-in an kawm tumin naupangte chu ring tak, hlim tak, inpe taka leh khauh tak sia enkawl tur an nih thu a sawi chhuak nghe nghe. 

Zirtirna a pek thiam em avang hian kum 2014 khan zirlaite puitu atan YouTube channel a siam ve ta a, kum rei lote chhungin subscriber maktaduai 2 a nei tling der. A channel hi zirlai ten an hlut chho tial tial a, tunah phei chuan subscriber maktaduai 10 chuang a nei tawh. 

A thiamna hi hmu fuhin education technology company pakhat chuan kum khata vbc 40 hlawh turin an sawm ta hem mai a, mahse he sawmna duhawm hi a hnar - mi mak tih pawh a hlawh hle. Sum hi a hnar satliah lo a, a aia tam thawh chhuah theih ringin huaisen taka ke pen a thlang zawk. 

YouTube bakah hian kum 2020 khan Pratik Maheshwari nen pawl 12 zirlaite tan mobile application an siam a, app hi hmang duh an tam em avangin a 'crash' hial! Hemi hnu hian 'PhysicsWallah' a din leh a, a company hi 2021-2022 khan 900% zetin a thang nghe nghe. Alakh Pandey leh Prateek Maheshwari te hausakna hi tunah chuan vbch 4,000 zet tling tawh angin an chhut. An company hian nikum chhung khan vaibelchhe 9,000 vel zet an lalut niin an tarlang.