Aizawl September 7, 2022 : Mizoram hmun hrang hranga Village Council leh Aizawl Municipal Council hnuaia Local Council bye- election neih zawh taka result chhuaka party tin ten thuchhuah an siamah lawmawm an tih thu an sawi vek a, an candidate tling te an lawmpui thu an tarlang bawk.

Tun tumah hian veng/khua 30-ah inthlanna neih a ni a, seat 65 (50+uncontested 15) an inchuh a ni. Village Council Seat nga awmna Siaha district-a Siaha Vaihpi Bazar-ah chuhtu awm lovin Independent candidate te tlinga puan an ni a, AMC huamchhunga Local Council thar, Leitan Ramthar leh Zemabawk South-ah te MNF candidate te chu chuhtu awm lova tlinga puan an ni bawk. Saitual district-a Keifang Venglai inthlan tur chu thulh a ni a, Lawngtlai district-a Hmawngbuchhuah-a inthlanna neih tur chu candidate qualified an awm loh avangin inthlan theih a ni lo bawk.

Tun tum inthlanah hian MNF-in seat 33, Congress-in seat 16, BJP-in seat 5  leh ZPM in  seat 5 an la a, VC&LC pathum inthlan ngai lo a ni. Aizawla Local Council hmun hniha inthlanah MNF-in seat an la lo a, Congress leh ZPM in seat khat ve ve an la a, chutihrualin Local Council hmun hnihah erawh chutu awm lovin MNF hi an tling thung. 

MNF chuan Seat 65 inchuha Seat 33 an la thei chu lawmawm an tih thu an thuchhuah neihah an tarlang a, By election hlawhtling tak neih a nih theihna tura vote thlaktu mipuite leh inthlan buaipuitute chungah lawmthu an sawi a, MNF candidate vote tu zawng zawngte chungah lawmthu an sawi bawk.

Congress chuan VC leh LC inthlanna hmun 30-a Seat 50 inchuhnaah Congress Party-in Seat 16 zet an la leh Congress party thlawp Independent Candidate pakhat thlantlin a ni chu lawmawm an tih thu an tarlang a, thlan tlin thar te duhsakna an hlan.

ZPM chuan seat 10 an chuha seat 5 an la thei chu lawmawm an tih thu an sawi a, hei hian ZPM hmasawnna nasa tak bakah party dangte huphurh rawn a ni tih a tarlang chiang hle a ni, an ti.