Independent-in Local Council seat 2 an la ; Village Council-ah Sawrkar siam thei awm lohna khaw 4 awm

Aizawl: Village Council 8 leh Aizawl khawpuia Local Council 23 inthlanna Zirtawpnia neih ah MNF party chuan seat an la tam ber. VC-ah sawrkara siam awm lohna khua pali a awm a, Local Council-ah independent seat hnih an chang.

Aizawl Municipality huam chhunga Local Councils 23 - Durtlang North, Durtlang, Chaltlang Lily Veng, Bawngkawn, Bawng-kawn South, Ramhlun North, Ramhlun Vengthar, Ramhlun Sports Complex, Thuampui, Dawrpui Vengthar, Khatla, Khatla South, Mission Vengthlang, Bung-kawn, BungkawnVengthar, Maubawk, Lawipu, Nursery Veng, College Veng, Republic Vengthlang, Mission Veng, Venghnuai leh ITI Local Council inthlanah hian a pum puia chhutin vote 66.44 % a tla a. Vote 63,325 (mipa 29,225 leh hmeichhia 34,100) awmah vote 42,072 tlain, mipa vote thlak 19,459 leh hmeichhia vote thlak 22,613 an awm.

Local Council-ah hian seat 157 awmin heng zinga 113 hi general seat a ni a, reserve seat 44 a awm bawk. Local Council-ah hian MNF party chuan veng 20-ah sawrkarna an siam thei a, Indian National Congress leh Zoram Peoples’ Movement-in veng 1 ve veah sawrkarna siamin veng 1-ah chuan party mala chak bik an awm lo a ni. Local Council-a party hrang hrangten seat an lak dan chu Indian National Congress-in general-ah 25 leh reserve-ah 11 niin a vaiin seat 36, Mizo National Front-in general-ah 75 leh reserve-ah 28 niin a vaiin seat 103, Zoram Peoples’ Movement-in general-ah 12 leh reserve-ah 41 niin a vaiin seat 16 a ni a. Local Council seat 2 chu Independent in an la a ni.

Village Council inthlannaah hian general seat 28 leh reserve seat 8, a vaiin seat 36 a awm a. MNF party chuan general seat 11 leh reserve seat 3 la in party mala seat la hnem ber an ni a. INC chuan general seat 10 leh reserve seat 2 an la a, ZPM-in general seat 4 leh reserve seat 2 an lak bakah Independent-in general seat 3 leh reserve seat 1 an la bawk a. MNF in khaw 3-ah sawrkarna an chang a, INC-in 1-ah sawrkarna changin party mala chak bik awmlohna khua 4 a awm bawk.

Village Council inthlanna hi Aizawl District huam chhunga khaw 8- Darlawn Chhim Veng, Darlawn Venghlun, Darlawn Vengpui, Hualngohmun, Kelsih, Melriat, Muallungthu, Sawlengah te neih a niin vote a tla tha thawkhat hle a, vote tla hi a pum puia chhutin 79.90% tla a. Vote 7,328 (mipa- 3,545 leh hmeichhia- 3,783) awmah vote 5855 tla in, mipa vote thlak 2,878 awmin hmeichhia vote thlak zat 2,977 a ni.

State Election Commission thuchhuah chuan COVID-19 leng mek hripui inkai darh hlauhawm dinhmunah an awm avanga Containment Area-a puan, inkharkhip/lockdown, Contact Tracing leh test result nghah mek a nih avangin, Ramhlun South Local Council-ah inthlan hi neih theih a la ni lo a, State Election Commission, Mizoram chuan an dinhmun thlir chung zelin leh Health & Family Welfare Department rawn chungin inthlan hun tur ruahmanna thar a la siam dawn niin a sawi.