Aizawl: August 27, 2020-a Village Council leh Local Council bakah MDC by-election neih tum chu sawn tumna a awm lo a. Inthlan huna mipuite himna atan theihtawpa hmalak tum a ni.

Zalen-in Mizoram State Election Commission thawktu te atanga thu a dawn danin VC, LC leh MDC by election thulh emaw, sawn tumna emaw a awm lo tih an sawi a. “Ni tin boruak kan en reng a, boruak awm dan azirin kan inthlan theih leh theih loh chu a hril dawn a. Inthlan theih loh tawp a nih loh chuan inthlan hram kan tum a, chutih rual chuan tum viau mah ila kan boruakin a zir loh chuan inthlang lo pawhin kan awm thei tho a ni,” an ti.

Vote thlak nia mipuite himna an ngai pawimawh tih sawiin SEC thawktute chuan sawrkarin himna atana inkaihhruaina SoP a siamte chu 100% zawm a nih dawn bakah inthlanna bik atan SoP dang tihchhuah leh a ni tih an sawi a. “Fimkhur theihtawpa thil tih kan duh a, District Election Officer tinten an bial chhungah ruahmanna an siam vek a, hun rei tak intlar awm lova vote thlak zung zung theih kan beisei a ni,” an ti.

SEC Secretary Teresy Vanlalhruaii chuan, “MPF leh YMA te nen tangkawpin in tinah voters slip sem a, voters te kal hun tur ruat kan tum a. Voter-te inhlata an awm theih nante hmalak kan tum a, voters te hming leh contact number-te chhinchhiah vek kan tum bakah voter-te chu vote thlak tura an luh hmain an kut tihfai (sanitize) vek kan tum a ni,” a ti.

VC leh LC thlan turah hian recognised political party te alphabetical order-in ballot paper-ah dah tur a ni a, general seat (mipa) chuhte tan ballot paper var hman a ni ang a, reserve seat (hmeichhia)-te chuan rawng sendâng (pink colour) an hmang dawn a ni.

Vote thlak tawhte chhinchhiahna ‘ink identification’-ah pawh tum danga an hman ang hmang lovin vawi khat hman chi beng hawlhna (ear bud) emaw. ha kherna (tooth pick) emaw hman an tum niin a sawi a. Vote thlakna ‘arrow crossmark’ pawh voter-te kut tihfai ‘sanitize’ a nih dawn avangin a him tawk turah an ngai tih SEC hotuten Zalen an hrilh.

Village Council inthlanna hi Lawngtlai leh Siaha tih loh district dang 9-ah neih a ni dawn a, VC 558-a seat 2,464-ah inthlanna neih a ni dawn a, voter 4,54,180 an awm a ni. AMC huam chhunga Local Council inthlanna hi veng 83-ah neih a ni dawn a, voter 2,18,758 awmin seat 545 a awm a. Heng zinga 397 hi general seat niin 148 hi reserved seat (hmeichhe tana hauh bik) te an ni. 18-Siaha North I-a MDC by-election neih a ni dawn a, voter 1,627 an awm a ni.