ZALEN February 9, 2025 : February 12, 2025-a village council leh local council inthlan lo awm turah VC bikah seat 40 chu chuhtu awm lova tlingah puan an ni a, hetih lai hian LC-ah erawh chuhtu awm loa tlinga puan an awm lo thung.

ZALEN-in State Election Commission thawktute hnen atanga a thu a dawn danin VC 29-a seat 40 awmah hian VC awm tur zat chiah member-in chuh tuma hming an pek luh avangin tlingah puan a ni a. Chuhtu awm lova tlinga puan takte hi Aizawl district-a Chhanchhuahna Khawpui seat thuma awm zinga reserve seat (hmeichhe seat) khat, Lunglei district-a khaw pahnih Sailen seat thum awm leh Sumasumi seat thum awm te, Serchhip district-a khaw pathum - Chhuanthar Tlangnuam seat nga, Hmunzawl seat thum awm zinga reserve seat khat, Neihloh khua seat thum awm zinga reserve seat khat te, Champhai district-a Buang khua seat thum awm zinga reserve seat khat, Melbuk seat 5 awm zinga reserve seat khat, Vangchhia seat nga te an ni.

Heng bakah hian Kolasib district-a Kawnpui IV V/C seat nga, Saitual district Hrianghmun khua seat thum, Khawzawl district Tualpui khua seat thum, Hnahthial district Aithur khua seat thum awm zinga reserve seat khat, Lungmawi seat thum awm zinga reserve seat khat, Lungpuitlang seat thum leh New Kawnpui seat thum te an ni.

Heti hian VC inthlan lo awm tura general seat 24 leh reserve seat 16-ah inthlan a ngai dawn lo a ni a. Party hrang hrang chuhtu awm lova tling zat hi ZPM general seat 17 leh reserve seat 12, a vaiin seat 29, MNF general seat thum leh reserve seat hnih, a vaiin seat 5, INC general seat thum leh reserve seat khat, a vaiin seat li bakah independent general seat khat leh reserve seat khat an ni.

LC hi AMC hnuaiah 87 awmin general seat 418 leh reserve seat 157, a vaiin seat 575 a awm a. Lunglei Municipal Council hnuaiah LC 24 awmin general seat 110 leh reserve seat 38, a vaiin seat 148 a awm a. AMC leh LMC hnuaiah hian a vaiin general seat 528 leh reserve seat 195 awmin municipal pahnih hnuaiah hian seat 723 ah inthlanna neih tur a ni a, LC bikah hi chuan chuhtu awm lova thlan tlin an awm lo a ni.

VC/LC ELECTION

VC chuh tur hian general seat-ah candidate 5,177 leh reserve-ah 1,652, an vaiin mi 6,829-in an chuh dawn a ni.

VC chuh tura hming pe lut zinga mi 102 chuan an hming pek an hnukkir leh.

Inthlan lo awm tura vote tamna ber chu Sihphir niin voter 3,448 an awm a, voter tlemna ber chu Sailen niin voter 80 an awm a ni.

VC bikah Aizawl district-ah voter tam berin 65,076 an awm a, Hnahthial district chu a tlemna ber niin 23,102 an awm.

VC leh LC inthlan turah hian Mizoram pumah voter 7,14,234 an awm a, heng zinga 3,40,017 chu mipa niin hmeichhia 2,74,217 an awm.

AMC-a LC inthlan turah voter 2,42,277 awmin heng zinga 1,11,512 chu mipa an ni a, hmeichhia 1,30,765 awmin mipa aia hmeichhia an tamna hi 19,253 a ni.

LMC huam chhunga LC inthlan turah voter 30,528 awmin heng zinga 11,165 chu mipa an ni a, hmeichhe voters 19,363 awm bawkin mipa aia hmeichhe voter an tamna zat hi 8,198 a ni.

LMC huam chhungah Electric Veng chu vote tamna ber niin 3,304 an awm a, Sazaikawn chu a tlemna ber niin 320 an awm.

AMC huam chhungah Zemabawk veng chu vote tamna ber niin 7,360 an awm a, Chite veng chu a tlemna ber niin voter 524 an awm.

AMC leh LMC-a LC chuh tum hian candidate mi 2,076-in hming an pe lut a, an zinga 1,520 hi general seat chuh tur an niin reserve seat chuh tur mi 556 an awm bawk.