ZALEN February 13, 2025 : MNF chuan an thuchhuah siamah ZPM sawrkarna hnuaia hnawhsarum zeta Village Council leh Local Council inthlanpui buatsaih chu a zo a. Thlan tlin zawng zawngte MNF chuan an lawmpui a, tling zo ta lo te chu an tawrhpui an ti a, inthlan result hian ZPM Party chu mipuite rilru-ah a tlahniam zel tih tarlannaah an ngai thu an sawi.

MNF chuan, "Sawrkar thar phur vanglai leh an kalthui hmaa inthlan hmachhawn kan ni a. Tum dang LC/VC inthlan neih tawha Ruling Party ten chakna an chan thin dan nena khaikhinin tun dinhmuna MNF-in chakna kan chan dan thlirin a lawmawm kan ti a. He inthlan result hian ZPM Party chu mipuite rilruah tlakhniam lam nasa takin an pan zel tih a tarlang chiang hle," an ti.

MNF party tana nghet taka ding a, MNF Candidate zawng zawngte a chhuangin, an thawhrimna leh inpekna fakawm a ti a. MNF candidate te tana rim taka thawk a, beitu party mipui leh an candidate te min vote puitu zawng zawngte chungah MNF chuan lawmthu an sawi.

VC/LC thlan thar zawng zawngte chu kalphung thar mipui sawrkar an zawrh ang ngeiin, mipui tan thlei bik awm lova hnathawk thei turin thuam chak se, thuneihna semzai kawnga mipui sawrkar din an tum chu thlan tharte hmang hian a takin hmang nghal tawh se an duh tih an tarlang bawk.

MNF thuchhuak chuan, "Mipuite duhthlanna hmanga thlantlin tak zawng zawngte, kan ram, kan hnam leh kan sakhaw himna tur leh kan khawtlang theuhin hmasawnna rahbi an rahna tura thawktu ni zel turin MNF chuan duhsakna kan hlan tak meuh a ni," an ti.