ZALEN March 12, 2025 : Vawiin khan Central YMA Committee Room-ah ram chhunga veng leh khua leh mihring chengte dinhmun dah kimchang khawmna tur 'YMA Village Profile Apps' tlangzarhna hun hman a ni a, Lalhmachhuana Central YMA President in a tlangzarh.

Central YMA President Lalhmachhuana chuan, "YMA chuan tunlai khawvel thang chho zelah YMA te pawh hma kan sawn chho zel a. YMA member mai ni lo, vengchhung/khaw chhunga mihring chengte dinhmun kimchang dah khawmna tur Village Profile kan nei thei ta hi a lawmawm tak zet a ni. YMA- in bung thar a kai dawn niin a lang a, Branch YMA ten veng mipui chhinchhiaha kumtin an ziah thar thin chu a ngai tawh dawn lo," a ti a, YMA-in hmasawnna kawng a zawh zel chu lawmawm a tih thu a sawi bawk.

General Secretary Malsawmliana chuan Village Profile Apps hi Lailen Consulting Private Ltd siam a nih thu leh Mizoram Sawrkar nen tang tlang a siam a nih thu sawiin hei hi YMA mai bakah Sawrkar tana Data tangkai tak a la nih tur thu a sawi. Village Profile siamna atan hian Home Department atangin Rs. Nuai 10 dawn a ni a, hei hian a siamna mai bakah kum engemaw chen a enkawl zui zelna tur a daih dawn a, Home Department chungah Central YMA in lawmthu a sawi a ni.

Village Profile App hi Aizawl City Branch 6 ah hman chhin phawt tura ruahman a ni a, a siamtu Lailen Consulting Pvt. Ltd atangin inhrilhfiahna hun hman a ni bawk.