ZALEN, Mar. 26, 2025: Kal kal ta Thawhtanni khawvar hmaa Venghlui, Aizawla Treasury bazar kang chhe ta sak that leh tuma tha thawh leh chungchanga Aizawl Municipal Corporation (AMC)-in lehkha a pek chu Venghlui Local Council chuan chhangin kutthlak zui tum a nih tawh loh thu an sawi.

AMC Commissioner hian Thawhlehni khan Venghlui LC chairman hnenah lehkha pein zing lama an veng miten bazar kang chhe tawh hungna tichhiaa inzuarte thutna tur siam thaa hma an la chu khapa titawp turin a ti a. A hmalakna chu Nilaini tlai thlenga a ngaihchan tur thu a hriattir.

Commissioner-in lehkha a pekah hian bazar khar leh kawngkama inpho thinte tihtawp chu assembly speaker, state sorkar leh AMC duh dan a nih thu a tar lang tel.

Lehkha an dawn hi Nilaini khan Venghlui LC secretary chuan chhangin bazar sak that tuma hmalakna chu pawi an ti hle tih a sawi a, “Kan duh dan ni miah lohva thil lo thleng hi inkhap daih duh hle mah ila, kan tihtheih piah lam a nih avangin veng mipuite kan dang zo lo a ni,” a ti.

Venghlui LC secretary chuan hemi ni veka Venghlui All NGO leh AMC hotute inbiakna leh home department koh joint meeting-in rah tha pahnih chhuah a vang te, an veng mipuite pawhin AMC leh sorkar au eih ta nia an inhriat tak avang te, AMC mayor-in LC leh NGO hmaa Assam Rifles chhuahsan ram a sihhmuhte tihpuitlinsak beisei chungin hma an la chhunzawm lo tih a tar lang a, ‘status quo’-a awm an remti tih a ziak.

LC hian hma la chhunzawm lo turin association leh NGO te pawh a hriattir tawh bawk tih a tar lang tel.

Treasury bazar kang chhe taa thute hi AMC chuan Tuikual South-a AMC Multi-Complex-a thu tawh turin a lo ti tawh a, Inrinni atang khan an thu tan nghe nghe.

Thawhlehnia bazar sak that tuma hmalakna awm hi social media-ah pawh titi a tling a. Aizawl Hmathlir Pawl (AHP) pawhin Nilaini khan Venghlui LC leh NGO ten bazar tur an sa lui mak an tih thu leh pawi an tih thu AMC commissioner hnenah an thlen.

AHP hian kangmei tawkte an tawrhpui thu an sawi rualin, “Helai hmunah hian bazar hi awm tawh lo se kan lo ti ve hle a ni,” an ti a. Commissioner-in bazar sak tihtawp a nih theih nana Venghlui LC hnena lehkha a pe pawh an thlawp tih an tar lang bawk.