Aizawl: Victim of Crime Compensation Scheme 2011 hnuaiah mi 283 te chhawmdawlna sum nuai 88.822 hmangin tanpui an ni tawh.

Zalen in Mizoram State Legal Service Authority atanga thu a dawn danin kum 2012-13 atanga 2020-21 inkar chhungin mi 283 hnenah chhawmdawlna sum pek a ni tawh a, heng zinga 230 hi hmeichhia an niin mipa 53 an awm bawk. Mi 283 te hnena chhawmdawlna sum pek belhkhawm hi a vaiin Rs. 8,88,22,000 a tling a ni.

Zalen palai zawhna chhangin MSLSA thawktu te chuan chhawmdawlna an pek zingah PoCSO case a tam ber tih an sawi a, pawngsual tuar in a dawt a ni. Victim of Crime Compensation hnuaiah hian civil case ni lova kut tuar te tan chhawmdawlna hi a dil theih a, chung dilna te chu district tina District Legal Authority ten ngaihtuahin chhawmdawlna hmu tlak nia an hriat te hnenah sum hi an hlan thin a. District Legal Authority hi Chief Judicial Magistrate in hovin DC, Police leh tlawmngai pawl aiawhte an tel a ni.

Chhawmdawlna dawn theih tur hrang hrang hi vanduaina an tawh dan a zirin an dawn theih zat a inang lo a. Mizoram chhunga cheng te tan chuan dil theih vek a ni a, kum 2018 a Guwahati rel station a a vanduaina tawk tlangval 2- R.Lalmalsawma (24) s/o PC Lalthanzami leh C.Lalhmangaihsanga (24) s/o Lalbeiseii, Lunglei Electric veng ve ve te hnenah pawh chhawmdawlna sum nuai 4 ve ve an chhungte pek an ni.