ZALEN March 23, 2025: Zirtawpni khan District Judge Meeting Room, District Court-ah Victim of Crime Compensation semna hun hman a ni a. Mi kut tuar avanga nunna chân leh kumtlinglo pawngsual tawk mi sawm pali hnenah zangnadawmna Rs 41,00,000 sem chhuah a ni.

District & Sessions Judge, Aizawl District leh Chairman, Aizawl District Legal Services Authority ni bawk, Helen Dawngliani chuan thu tawi sawiin kal khawmte hnenah hun hman chu hmang lo thei ila an duh ber a, mi pawikhawihna avanga hetiang hun hman a ngai thin chu a pawi tak zet a tih thu a sawi.

“A tuartu kan lo nih takah chuan vawiin a hetiang sem hi sawrkar hian an tana tha turin heng thil hi a ti a ni tih hre reng a, an sum leh pai dawn hi chhungkua emaw, mi mal emaw an dam khawchhuah nan nunphung pangngai an lo zawh leh theih nan tangkai taka kan hman hi kan tih tur leh chu chu sawrkar pawhin a phut a hrereng ang u,” tiin dawntute chu a fuih.

Compensation semna hun hman a nih hnuah victim chhungte hnen atangin thusawi ngaihthlak a ni a. Lalrochami Ralte, Chief Judicial Magistrate leh Secretary, Aizawl District Legal Services Auhtority ni bawk chuan kalkhawmte hnenah lawmthu sawiin an sum dawnte dik lo taka hman sual theih a nih avangin an fimkhur a ngaihzia a sawi bawk.