ZALEN Feb 14, 2015; State Election Commissioner Dr. H Lalthlangliana'n Village Council (VC) leh Local Council (LC) inthlan neih zawh takah, candidate thlan thlan tur zat aia tam thlang chu vote thih chhan tam ber a ni tih a sawi.

Vawiin (14.2.25) a thuthar thehdarhtute a kawmna-ah zawhna chhanga he thu hi sawiin, Dr. H Lalthlangliana chuan, VC leh LC inthlan chu Assembly inthlan nen khaikhin chi a ni lo tih sawiin, VC leh LC inthlanah vote thi a tam hmain a lang a, paper thlen tur a sei a, vote tur an tam avangin vote thlak chhung pawh a rei niin a sawi.

Vote thlak dan phungah rawtna hrang hrang an dawng mek tih sawi bawkin, chungte chu uluk zawkin an zirchiang zel dawn niin a sawi.

Kumin inthlanah kum danga la tih ngai loh inthlan kaihhnawih a duty turte tan vote thlakna hun siam a nih thu leh chutah chuan mi 3,616 in vote an thlak thu a sawi.

Dr. Thlanga chuan inthlan neih zawh takah boruak a muanawm hle tih sawiin, kum dang aiin party hrang hrangte an ṭang zawk nia a lang chungin, politics a inbeihna sosang tak tak hriat tur a awm lo tih a sawi a, dan leh thupek bawhchhia, inthlan tibuai khawp pawh khawi atang maha report an dawn loh thu a sawi.