Aizawl June 25, 2024 : ZPM Thalai chuan Ni 21.6.2024 a Zoram Medical College-ah Water Jet hmanga (tui phuh chakna hmanga inzaina) thin cancer damlo hlawhtling taka zai a ni chu lawmawm an ti a, ZMC lama mithiam hrang hrang:- doctor, nurse, technician leh thawktu dangte thiamna leh inrintawkna a ropui an ti a, thawktute an chhuangin thlamuanpuiawm a ti.

ZPM Thalai chuan, "Mizoramah hrisêlna kawnga inenkawlna in hma a sawn theihna tura hmalatu Health Minister Lalrinpuii kan nei hi a thlamuanthlâk kan ti a, hriselna lama inenkawlna kawngah state dang awt reng renga kan awm thin chu kalphung thar, mipui sawrkâr hnuaiah a ziaawm zel kan beisei tlat a ni," an ti.

"State chhûnga hriselna inenkawlna kawngah thawktute thiamna a taka cho chhuak tur chuan hmanrua leh khawl tha neih a ngai a, hetiang kawnga thiamna leh hmanraw thuam chak hi ZPM policy-in a ngaih pawimawh a ni a, a tihlawhtling turin sawrkârin ke a pen mêk a ni. Mipuite thlamuang leh hrisel zawka kan awm theih nan thawktute thiamna leh kan Health Minister inpêknate Pathianin mal lo sawm zêl rawh se tih hi kan tawngtaina a ni," an ti bawk.