India-a wrestler langsar ber chuan mawi lo taka mipat hmeichhiatna lam hawia infiam mi hmeichhiate khawih thin a duh lohzia lantir nan a medal dawn tawh pahnih a kir.

India-a hmeichhe wrestler zinga lawmman dawng tam tawh ber zinga mi, Vinesh Phogat-i hian Inrinni khan Prime Minister Narendra Modi-a hmuh an phalsak loh avangin kawng sirah a dah a ni.

Phogat-i leh wrestler dang tam tak chuan Wrestling Federation of India (WFI) chief hlui, Brij Bhushan Singh-a kha kum eng emaw zat chhungin wrestler hmeichhiate laka mawi lo taka che thinah an puh a ni.

Singh-a erawh chuan an puhna hi a pha thung.

Phogat-i hian kar liam taah khan an rama infiam mite chawimawina sang ber, kum 2020-a a dawn, Khel Ratna award leh Arjuna Award a dawnte chu a kir dawn tih a sawi a. Heng chawimawina hi sorkarin a pek ve ve a ni.

Award pahnihte hi Modi-a hnen ngeia pek kir a tum a; mahse, police-in an lo dang.

Phogat-i hian kawng sirah a hnutchhiah ta a. Heng chawimawinate hi wrestler-ten dikna chanvo an hmuh loh lai chuan engmah lo a nih thu a sawi.

Indian wrestler-te hian January daih tawh atang khan lungawi lohna hi an lantir tawh.

World Championship-a vawi hnih medal la tawh, Phogat-i hian hmeichhe wrestler 10 velin Singh-a hi an chungah mawi lo takin a che niin an sawi tih a sawi a. Singh-a hi MP niin rorel lai, BJP-a tlang tla tak a ni.

Court pawhin hetiang thil thleng sawi hi ngaihtuahin Singh-a hi mawi lo takin a che niin an sawi.

Phogat-i hian kum 2021 daih tawhah khan prime minister hnenah pawh complaint a thehlut tawh tih a sawi.

May thla khan wrestler-te hian Delhi-a lungawi lohna an lantir laiin an chungah dik lo takin police an che niin an sawi bawk.

Singh-a aiawhtu tur hian a thuihhruai zinga mi chu federation president thar atan thlan zui leh a ni a, hei hian thinrimna a siam nasa zual leh bawk.

Hmeichhe wrestler lar dang, Sakshi Malik-i chuan Singh-a tana rinawm zinga mi thlan chhuah a duh lohna lantir nan inkhelh a chawlhsan thu a puang nghal.

Kum 29 mi, Phogat-i hi World Championship, Commonwealth Games leh Asian Games-ah medal a lo la tawh.