Aizawl; Excise minister Dr. K. Beichhua chuan ‘wine rules’ nei thei tura hma an lak mek thu ZALEN a hrilh. Hetihlai hian wine rules chu pawmpui (vet) turin Law & Judicial department-ah a thang mek nia thudawn a ni. 

ZALEN zawhna chhangin excise minister chuan wine rules nei thei tura hma an lak mek thu leh an hmalakna chu a hlawhtling turah an ngai tih a sawi. Wine rules chungchangah vek hian Mizoram sawrkara Law & Judicial Department Secretary Helen Dawngliani, MJS chuan ZALEN zawhna chhangin vetting turin an kutah a awm mek tih a sawi a, anni lamin an tih turte an tih zawh hunah an recommend-te nen, a department neitu lamah a kal leh tur thu a sawi.

Hetihlai hian zu khapna dan, Mizoram Liquor Prohibition Act 2019 hnuaiah zu hrim hrim khap bur a nih avang leh kumin March 25-a council of ministers thukhawmin Mizoram Liquor (Prohibition) Rules, 2022 a pawm takah pawh wine chungchang telh a nih loh avangin dan dinglaiah chuan grape wine siam/zawrh khap a ni

Tar lan tawh angin, Mizoram sawrkar chuan May 27, 2022 khan Excise & Narcotics department (END) chu grape wine zawrhte man turin a hriattir a, END-a thawktute chuan grape wine enge emaw zat an man nghal a. He thil thleng chungchangah hian Champhai District NGO Coordination Committee chuan, June 4, 2022 khan thuchhuah siamin Champhai leh Hnahlana grape wine siam chhuahte sawrkarin a mansak chu pawi an tih tak zet thu leh Champhai leh khawchhak tlangdungte hmuhsitnaa an ngaih thu an tar lang.

Hnahlan leh Champhai grape chingtute pawhin tun hnai khan wine an siam chhuah theihna tura dan siamsak an nih theihna turin eptu party - Congress, ZPM, Mizoram BJP leh PC party-te hnen atangin dan hnuaia wine an siam chhuah an dodal loh thu tar lanna, ‘no objection certificate’ lehkha an lo la tawh a, chungte chu excise minister hnenah an lo thehlut tawh a, heng bakah hian chief minister hnenah a rang thei ang bera wine rules siamsak tura ngenna an lo thlen tawh bawk.