WHM-in case a dawn dan

Kum          Case dawn
2016-17    812
2017-18    1320
2018-19    1539
2019-20    1624
2020-21    2677
2021-22    918
Total         8890

(181 (a thlawna biakna/toll free), 0389-2317123/2311271 (landline) ah emaw mobile no. 9436743380)

Aizawl: Hmeichhia te tanpui tura din Women Helpline Mizoram chuan an dintirh atanga August 2021 thleng khan harsatna hrang hrang avanga pantu 8890 an nei tawh a, Women Helpline pantu hmeichhia te harsatna/ kut an tawrhna tam ber thlentu chu zu leh ruihhlo a ni.

Women Helpline Mizoram hian an dintirh July 2016 atanga August 2021 thleng khan telephone hmanga tanpuina dil leh bia mi 8890 an nei tawh a, an hnena harsatna thlentu zinga 62% chu kut inthlakna kaihhnawih (domestic violence) a ni a, a dang 38% hi tawngka leh thildanga tihduhdahna (non domestic violence) a ni. Hmeichhe tihduhdah tuar zinga a tam ber 38% hi pasal nei lai an ni a, 26% chu kawppui la nei lo niin 20% chu pasal nei tawh lo an ni.     Harsatna tuartu zing 59% hi kum 21-40 inkar an ni a, kum 41-60 inkar 18% leh kum 11-20 inkar 14% an awm bawk. 

Hmeichhiate harsatna thlentu ber/ a bultumtu (perpetrator) zingah an pasal (husband) an tam ber a, 39% niin an bialpa, unau leh pa te chu harsatna thlentu lang sar zinga mi an ni .  

ZALEN zawhna chhangin Women Helpline Mizoram thawktute chuan inchhungkhura hleilenna (domestic violence) chu an case dawn zingah a tam ber nia sawiin an client domestic violence tuar te hian a tlangpuiin kut inthlak piah lamah tawngkaa invau leh inrikrapnaan tuar tel tlangpui niin an sawi a.

"Kan client te ah hian ngun taka case study neih thin a ni a. Chuta kan hmuh chhuah chu anmahni chunga harsatna thlentu/accused te zingah ruihhlo, a bikin zu in mi an tam hle a. Damdawi leh ruihhlo danga inhnamhawih pawh engemaw zat awm tho mah se, ‘Zu’ a ni tlangpui a. Accused zinga tam ber chu an pasal te an ni," an ti a. "Hei bakah hian harhfim reng chunga hmeichhe chunga hleilenna thlen hreh lo enge maw zat an awm bawk a, mipa tam takin hmeichhe humhalhna dan chungchangah awareness an neih tlem vang te pawh a ni," an ti bawk.

Physical abuse tuartu zingah kawppui nei lai leh nu valai (kum 20-40 inkars) an tam chhan chu an client (pasal) te zingah ruihhlo, a bikin zu hmangsual an tam vang a ni ber tih an sawi a. "Pasal la neilote-ah pawh, nuta emaw an pa te emaw in khata an chenpui zu-in mi leh kut ram deuh an awm vang a ni fo a. Ngaihzawng te leh Live-In Partner (man leh mual inhlan lova chengdun) te atanga hleilenna tuar an awm fo a ni," an ti a. "Kum 20 – 40 inkarah hian nupui pasal a insiam, nupa nihna kawnga mawhphurhna hrethiam tawklo leh rilru puiting tawklo an tam vangte pawh a ni thei," an ti bawk.

Women Helpline Mizoram thawktute chuan an mahni pantu tam ber chu Aizawl khawpuia chengte an ni tih an sawi. Hei hi a chhan ber chu Mizoram mipui tam zawk awmna a nih vang a ni. Thingtlang lam atanga case an dawn tlem chhan chu mihring cheng an tlem vang mai bakah internet leh phone connectivity te a mumal loh zawk vang nia an hriat thu an sawi. Hmeichhe hnuaihnung leh lehkhathiam lo zawk ten kut tuar nasa bik chuang lo tih sawiin, " Hmeichhia ten mipa kut an tawrh chhan hi hmeichhe zir san lam emaw, a quality emaw, a status vang niin a lang lo a. Mi challang tak tak leh lehkha zir sang tak tak zingah pawh hleilenna tuar enge maw zat an awm tho a. Mipa ten ruihhlo an khawih nasat vang leh hmeichhe humhalhna dan lama awareness nei mumal lo an la tam vang zawk niin kan hria," an ti bawk.

Women Helpline Mizoram thawktute chuan Women Helpline chu hmeichhia hleilenna tawktute chauh ni lovin hmeichhia kawng hrang hranga harsatna tawkte zawng zawng in engtik lai pawha an biakpawh theih turin darkar 24 chhung an in hawng reng tih sawiin harsatna nei te chuan hmang tangkai se an duh tih an sawi.