Aizawl September 25, 2023 : BJP Mizoram State Spokesperson Lalremsangin Fanai chuan NDA-BJP kaihhruaina hnuaiha India ramin bung thar a kai a ti a. Hun rei tak atanga buaipui hlawh Women Reservation Bill pawh Praliament rorelna sang, Lok Sabha leh Rajya Sabha-ah te lungruak taka pass a ni chu lawmawm leh chhuanawm a tih thu a sawi.

Lalremsangi Fanai chuan, Parliament Building thar chhunga rorelna neih hmasak bera Bill pass hmasak bera India ram hmeichhiate tana 33% (1/3) seat zuah tur atana Bill, Ruling leh Opposition party pawh sawi lo a, member zawng zawng ten lungrual taka an pass bakah opposition lamin a rang thei ang bera hman nghal an duhna hian he bill pawimawh zia leh pass tul zia a tilang, a ti.

"Democracy bul thut, Panchayati Raj/Village Council leh Municipalities rorelna chhungah Women Seat Reservation felfai taka thliar hrangin India tam pumah kalpui vek a ni tawh a. Ram rorelna sang State Legislative Assembly leh Parliament chhunga hmeichhiate dinhmun chawisanna, policy making mawhphurhna pek leh dan zahawmna kalpui mek hian India ram ropuina sang lehzualah a thlen ngei ang," BJP State Spokesperson chuan a ti bawk.