India rama tual chhunga hmeichhe cricket inelna ngaihhlut, Women’s Senior One Day Trophy 2023-24-ah Mizoram chuan Pathianni khan wicket thumin Bihar an hneh.

KIIT Cricket Stadium, Bhubaneshwar, Odisha-a Group B inkhelah hian quarterfinal luh beiseina nei tawh lo Mizoram tan hian a vawm lamah Tarang Jha che thain over 10 a vawmah mi pathum a vawm hlum a, run 25 chiah a pe thung a. A vuak lamah opener Lalrinfeli’n run 44 a thawh a, MP Singson chuan thi lovin run 36 a siam bawk.

Bihar nulaten vaw hmasain over 50 chhungin run 157 chauh an puitlin thei a, mi pakua an thi a; an captain Apurva Kumari chuan run 61 thawhin a thianten an puih that tawk loh an tuar a. Mizo bowler zingah Jha-i bakah hian Lalrinmawii leh Jacinta Laltanpuii ten mi pahnih ve ve an vawm hlum bawk.

Mizoramin an target sang lem lo tak um hian bul an tan chhe lo va, Felfeli’n bul a tanpui, captain Shweta R. Jadhav-i’n run 23 a vaw chhuak a. Run siam lovin Varsha Choudhury chhuak zui leh nghal mah se Vanlalremtluangi (run 14) leh Jha (run 11) ten an thawh chhiat vak loh bawk avangin over 50 turah over hnih hmang bângin mi pasarih thiin hnehna an chang ta a ni.

Senior Women’s One Day League tih thin, Women’s Senior One Day Trophy tih tak hi Board of Control for Cricket in India (BCCI)-in hmeichhiate tana buatsaih, List A tournament a ni a. Kuminah hian team 37 an tel.

Mizoram hi Group B-ah awmin Karnataka, Vidarbha, Gujarat, Tripura leh Puducherry te hmachhawn tawhin hneh an la nei lo va, Bihar an hneh hi an vawi khat chakna a ni a. Thawhlehniah hian group stage inkhel hnuhnung berah an chung chiaha awm, Jharkhand chu Ravenshaw University Ground 1, Cuttuck, Odisha-ah an hmachhawn leh ang.

Kumin Women’s Senior One Day Trophy-ah hian group pangaah awmin group khata awmte an inkhelh kual chhuah hnuah a sang ber theuh leh pahnihna zinga titha ber pakhatten quarter-final an lut dawn a, pahnihna ni ve dang paliten pre-quarter-final an khel dawn thung a ni.

Mizoram hian khelh rukah hnehna vawi khat chiah an la chang a, an group-ah parukna ni mekin an hmabakah Jharkhand hi hneh mah se quarterfinal lut theihna an nei tawh lo a ni.