June 9, 2022; Kum 2021-22 chhung khan Mizoram Building & Other Construction Workers’ Welfare Board (MBOCWWB) chuan an member 209 boral (natural death) chhungte hnenah death benefit Rs. 2,09,00,000 a pe a. Covid-19 package mi 1,425 hnenah Rs. 2,78,01,000 a pe bawk.

Labour, Employment, Skill Development & Entrepreneurship department hnuaia MBOCWWB hotute hnen atanga ZALEN thudawn danin, kum liam ta 2021-22 chhunga death benefit pek mi 209-te chu cheng nuai 1 theuh pek an ni a, benefit pekah hian accident-a thi an awm lo a, natural death vek an ni. 

MBOCWWB a tanpuina dil zing a mi, an member Covid hri kai mi thahnemtak an awm tawh a, chung zinga home isolation a awm, enkawlna hmun dang, 4C, ZMC leh 3C-a awm mi 1,425  te chu tanpuina covid 19 package pek an ni a, chuta senso zat chu Rs. 2,78,01,000 a tling. MBOCWWB member Covid vanga thi mi 3 chhungte hnenah Rs. 3,00,000 theuh, a vaiin Rs. 9,00,000 pek an ni bawk.

MBOCWWB member hnathawhna hmuna chetsual avanga boralte chu Rs. 3,00,000/- thleng pek theih a ni a, an hnathawhna kaihhnawih ni lo leh chhan dang avanga boral an nih chuan Rs. 1,00,000/- pek theih a ni thung. Hengte bakah hian 2021-22 chhung khan MBOCWWB chuan an memberte hnenah chhawmdawlna chi hrang hrang engemawzah pek an nei bawk. 

MBOCWWB:

1. India khua leh tui diktak kum 18 – 60 inkar, kumkhat chhunga ni 90 tal inhlawhfate chu member an ni thei.
2. Registration Fee ₹25/- a tira pek a ngai.
3. Thlatin membership tih nun nan ₹10/- pek ziah a ngai a. Amaherawhchu, thlatin pe lovin kumkhat atân ₹120/- pek lâwk theih a ni.
4. Membership Fee/Renewal Fee hi kumthum thleng pe lawk duh tan a pek lawk theih.