Argentine Angel Di Maria chuan Qatar World Cup a khelh zawhah international football chawlhsan a tum thu a sawi. Manchester United forward hlui Di Maria chuan,"Hun rei tak atanga ka thil duh (Copa America) ka chawi tawh a, ka chawlh a hun tawhin ka hria. Ka khel chhunzawm zel a nih chuan selfish rawng a kai thei tawh dawn tlat a ni," a ti.

Di Maria chuan,“Kumin World Cup zawh hi ka tan chawlh hun tha ber a ni. Kan upa tawh a, tunah chuan thangthar thiam tak tak, international level-a zahpuiawmlo an rawn chhuak nual tawh a ni. Vawi khata khelh that phut a harsat thin avangin khel tam se, muangchangin an rawn khel tha chho ve zel ang a, kan ram innghahna tur an la ni dawn a ni," a ti.

He thu hi Argentina leh Italy inhmachhawn hmaa reporter ho hmaa a sawi niin kum 34 mi Di Maria hian ram tan match 121 khel tawhin goal 24 a thun tawh a ni. Kum 28 hnua Argentina major tournament-a an champion lehna hmasa ber tum nikum July thla khan, Argentina hian Copa America final-ah Brazil chu sikhat faia hnehin an champion. Hemi tuma goal awmchhun hi Di Maria-a thun a ni.
 
Tun transfer hun hawn chhung hian Di Maria hian Paris Saint Germain a chhuahsan dawn a, season tharah khawi club tan nge a khelh dawn a la tichiang lo thung.